Fræknleiki grunnskólanema eykst ár frá ári
Það getur verið þrautinni þyngri að hanga lon og don í slá.
Ljóst er af tölfræði yfir meðaltöl úr Skólahreysti undanfarin þrjú ár, að hreysti íslenskra grunnskólanema hefur fleygt fram. Til marks um þetta eru líka metin í einstökum greinum keppninnar sem tekið hafa breytingum ár frá ári.
Meðaltölin hafa batnað bæði í undankeppnunum ár frá ári og einnig í úrslitunum. Þannig náðust að meðaltali 25,9 upphífingar árið 2007. Þeim fjölgaði í 29,3 árið eftir og í 34 í fyrra. Íslandsmetið er 58 upphífingar en það setti Eyþór Ingi Júlíusson úr Myllubakkaskóla í fyrra.
Sama er að segja um armbeygjur, þær voru 34,6 árið 2007, 45 ári seinna og 54 í fyrra. Íslandsmetið er í sérflokki, en í fyrra tók María Ása Ásþórsdóttir úr Heiðarskóla í Reykjanesbæ, tók heil 95 stykki.
Dýfumeðaltalið 2007 var 31,8, árið 2008 var það 32,9 og í fyrra 38. Útlit er fyrir að þetta meðaltal verði bætt í ár, ef ekki öll. Íslandsmet var sett í fyrra, 67, dýfur en í forkeppninni í ár var það bætt og hljóðar nú upp á 79 dýfur. Þar var að verki Valgarð Reynhardsson úr Lindaskóla í Kópavogi.
Meðaltalið fyrir hreystigreip var 2:24 mínútur árið 2007 en sá tími jókst í 2:36 mínútur í fyrra. Undantekningin frá reglunni er að meðaltalið í þessari grein dalaði 2008 og var 2:21 mínúta. Metið í þessari grein tók miklum breytingum í ár. Það var 5:29 mínútur en í í riðlakeppninni í vetur bætti Birta Jónsdóttir úr Varmárskóla í Mosfellsbæ það í 6:28 mín.
Loks er spurning hvort metið fyrir hina 10 greina hraðaþraut stenst átökin í ár. Það er 2:07 mínútur, í eigu Eyþórs Inga Einarssonar og Soffíu Klemensdóttur úr Heiðarskóla í Reykjanesbæ, sem vann úrslitakeppni Skólahreysti í fyrra.
Íþróttakennarar eru sammála um, að tilkoma Skólahreysti hafi aukið áhuga barna og unglinga á hreyfingu stórum. Séu ofangreind meðaltöl góður mælikvarði er ljóst að fræknleiki grunnskólanema eykst ár frá ári.
