Tvö ný Íslandsmet sett í Skólahreysti í vikunni

Skólahreysti MS í ár fer af stað með látum, en keppni hófst í vikunni. Strax á fyrstu dögum keppninnar féllu tvö Íslandsmet.

Valgarð Reynaldsson úr Lindaskóla setti met í dýfum þegar hann tók 83 slíkar í keppninni síðastliðinn fimmtudag. Fyrra met átti hann reyndar sjálfur og það hljóðaði upp á 81 dýfu og var slegið í keppninni í fyrra.

Lið Myllubakkaskóla og Lækjarskóla virðast einnig hafa unnið heimavinnuna sína því keppendur úr þeim skólum settu báðir Íslandsmet í armbeygjum. Gamla metið var 95 armbeygjur sem María Ása Ásþórsdóttir úr Heiðarskóla í Reykjanesbæ átti.

Fyrst var það Jóhanna Júlía Júlíusdóttir úr Myllubakkaskóla sem tók 98 armbeygjur síðastliðinn fimmtudag og átti hún því nýtt Íslandsmet í nokkrar mínútur eða allt þar til Dóra Sóldís Ásmundardóttir úr Lækjarskóla mætti til leiks og tók 100 armbeygjur.