Rólegt í Vopnafirðinum en ágætt í Þistilfirðinum

Veiðimenn hafa baðað sig í sólarlandablíðu á Norður- og Austurlandi síðustu dægrin. Samkvæmt vikulegum tölum frá Landssambandi veiðifélaga virðist veiðin rólegri í Vopnafirðinum en oft áður, en ágætlega gengur í Þistilfjarðaránum. Það verður þó að hafa í huga að árnar voru gríðarlega vatnsmiklar í upphafi vertíðar og fram í fyrstu daga þessa mánaðar.

Selá í Vopnafirði er komin upp í 253 laxa sem er talsvert undir veiði síðustu árin. Hópur veiðimanna sem nú er að veiðum í ánni og hefur veitt í henni um árabil hefur veitt helminingi minna en í venjulegu ári. Á sama tíma í fyrra var Selá með 353 laxa og endaði í 1.664 löxum á land í lok tímabils. 

Hofsá hefur verið nokkuð langt frá sínu besta í sumar; er komin með 138 laxa á land, sem er vikuveiði upp á 57 laxa. Á sama tíma í fyrra var búið að bóka 302 og var lokatalan þar 1.203. Í gær veiddi þar norskur veiðimaður 105 cm hæng í Skógarhvammshyl.

Fréttir hafa hins vegar borist af góðri veiði í Þistilfjarðaránum. Í Svalbarðsá eru til að mynda komnir 142 laxar á land og var vikuveiði þar upp á 62 laxa. Veitt er á þrjár stangir í ánni en á svipuðum tíma í fyrra var búið að skrá þar 144. Ekki hafa borist nákvæmar fréttir úr öðrum ám á svæðinu, en það sem þó hefur komið fram bendir til þess að veiði sé þar með ágætum. Holl sem lauk veiði í Hafralónsá um miðjan júlí landaði 21 laxi í þriggja daga veiði á fjórar stangir. Var þá heildartalan komin í 43 laxa og mest var það stórlax og áin þá rétt að ná því að verða viðráðanleg til veiða eftir mikil flóð vegna snjóbráðar. Veiðimaður sem var í hollinu á eftir náði að landa níu löxum á þremur dögum og þar af einum 99 cm sem tók í Stapa. Svipaða sögu er að segja frá Sandá og Ormarsá á Sléttu. Fram að þessu hafa menn aðallega verið að veiða mjög stóra tveggja ára laxa og eins árs fiskurinn ekki látið sjá sig mikið enn sem komið er.  

• Blogga um frétt

Seinustu hundraðkallar sumarsins