Metveiði í Refasveitinni

Mjög vel veiddist í Laxá í Refasveit í sumar eftir fremur rólega byrjun. Kom í ljós þegar talið hafði verið upp úr veiðibókinni eftir að veiði lauk hinn 21. september síðastliðinn að metveiði var í ánni og voru lokatölur 501 lax. Fyrra metið var frá sumrinu 2013 þegar 475 laxar komu á land, en árið 2013 veiddust 230 laxar.

Að sögn Atla Þórs Gunnarssonar á Mánaskálum í Laxárdal var veiðin róleg framan af og mun minna af stórlaxi en oft áður.  Þegar leið hins vegar á júlí og skilaði smálaxinn sér í miklu magni og var veiði góð allt fram að lokun. Stærsti laxinn sem kom land reyndist vera 95 cm hængur sem veiddist á maðk á svokallaðri Horneyri hinn 8. júlí.  

Atli sagði að það ætti að líta vel út með næsta sumar og að öllu óbreyttu ætti að verða gott stórlaxasmar því yfirleitt héngi gott smálaxasumar saman við góða veiði á stórlaxi árinu seinna í Refasveitinni. 

Atli kvaðst hafa farið um mánaðamótin september/október í ána til að ná í hrygningarfisk til að flytja ofarlega í Norðurá sem er ein af þverám Laxár. Hefðu þrjár hrygnur verið teknar úr svokölluðum Efri Rana, en í Neðri Rana kvaðst Atli hafa séð góða torfu af björtum nýlegum fiski.  Atli sagði að lokum að veiðileyfin fyrir næsta sumar væru þegar uppseld, en talsvert af útlendingum veiðir þar nú orðið.

• Blogga um frétt

Seinustu hundraðkallar sumarsins