Mjög góður gangur í Elliðaánum

Fín veiði hefur verið í Elliðaánum frá því þær voru opnaðar fyrir viku.

Samkvæmt upplýsingum frá Ólafi E. Jóhannssyni, formanni árnefndar Elliðaánna, voru í gærkveldi komnir 94 laxar á land sem er mjög gott miðað við fyrri ár. Hann sagði að ágætis laxagengd væri í ánum þessa dagana og lax að ganga á hverju flóði og útlitið því gott fyrir sumarið.

Júníveiðin í fyrra var til dæmis 44 laxar og er útlit fyrir að júníaflinn í ár verði í kringum 150 laxar ef sami gangur verður í veiðinni og verið hefur. Ef þannig fer verður veiðin á pari við árið 2013, en þá var byrjunin mjög góð í Elliðaánum. 

Fram kom hjá Ólafi að í morgun voru 120 laxar gengnir í gegnum teljarann og fyrir ofan teljara hafa þegar veiðst 45 laxar það sem af er. Þar af hefur 11 löxum verið sleppt þannig að nettótala veiddra laxa ofan teljara er 34 sem þýðir að 86 laxar eru ofan teljara. 

Þá mun lax vera farinn að dreifa sér þokkalega á efri svæðin, þannig eru Árbæjarhylur, Hundasteinar, Hraun og Símastrengur farnir að gefa lax, en gera má ráð fyrir að lax sé genginn upp í Höfuðhyl sem er efsti veiðistaður í Elliðaánum. Menn eru hins vegar lítið farnir að fara þangað uppeftir, enda mun meira af laxi samankomið á neðri svæðunum. 

Alls eru 5 laxar lengri en 70 cm komnir úr Elliðaánum, þar af eru tveir 87 cm langir. Annar þeirra var vigtaður og reyndist 7,5 kg. Nefna má að í gærkveldi sáust allnokkrir stórlaxar í Fosskvörn, sem er næsti veiðistaður neðan við Sjávarfoss, og taldi sjónarvottur að laxarnir væru vel yfir 5 kg. Stórlaxinn sem Jóhann Mar Ólafsson (86 cm og 7,5 kg) veiddi í gær hefur væntanlega verið úr þeirri göngu.

• Blogga um frétt

Seinustu hundraðkallar sumarsins