Stórlax úr Vatnsdal

Stórlaxarnir eru byrjaðir að taka í Vatnsdalsá og kom einn úr yfirvigt á land í kvöld. 

Það var veiðifélagi Björns K. Rúnarssonar, umsjónamanns árinnar, sem veiddi 106 cm hæng í hinum alræmda stórlaxastað, Hnausastreng. Að sögn Björns tók sá stóri klassíska einnar tommu Collie dog-túpu út af grjótgarðinum í strengnum sjálfum.  

Veiðimaðurinn þurfti að hafa mikið fyrir fisknum sem rauk langt út á undirlínu strax í upphafi, en hægði svo á sér og þumbaðist mikið eftir það. Það tók veiðimanninn ekki nema 35 mínútur að landa honum og þá fyrst áttuðu þeir sig á því hve stór hann var. Að sögn Björns var þessi fiskur ólúsugur og sennilega búinn að vera í ánni í um 10 daga.

Björn segir að menn hafi orðið varir við nokkra í þessum stærðarflokki í ánni frá því hún var opnuð, aðallega í Hnausastrengnum en einnig í uppánni frammi í dal. Björn veiddi annan 102 cm fyrir nokkrum dögum í opnunarhollinu úr Hnausastreng.

Á síðdegisvaktinni í dag komu tíu laxar á land og voru Björn og félagi hans með sex laxa á stöngina, einn smálax, fjóra stórlaxa frá 84 til 87 cm og svo þann stóra. Stöngin sem deildi með þeim svæði náði einum 90 cm grálúsugum úr Hnausastreng.  

Áin hefur því gefið samtals 135 laxa frá því hún var opnuð hinn 20. júní síðastliðinn, sem er afburðargóð veiði, og er meðallengd veiddra laxa rúmir 83 cm eða um 13 pund. 

• Blogga um frétt

Seinustu hundraðkallar sumarsins