Sjóbirtingsveiði fer vel af stað

Fréttir hafa borist af því að sjóbirtingsveiði í Vestur-Skaftafellssýslu fari óvenjuvel af stað.

Fyrsta hollið sem byrjaði í Tungufljóti í Skaftártungum veiddi 45 fiska, en nú hefur orðið sú breyting þar á að nú er eingöngu veitt á flugu og aðeins er heimilt að drepa tvo sjóbirtinga á dag á hverja stöng. Þetta lofar góðu því oftar en ekki byrjar sjóbirtingsveiðin mun seinna í Tungufljóti, stundum ekki fyrr en komið vel fram á haustið. 

Sömu sögu er að segja frá Laxá og Brúará í Fljótshverfi þar sem veiðin byrjar ágætlega. Að sögn Harðar Haukssonar, eins af landeigendum, þá byrjuðu fyrstu veiðimennirnir að koma fyrstu dagana í september og hafa allir fengið fisk og hefur fiskur veiðst alla leið upp í Brúarárfoss sem þykir góð vísbending.

Líkt og í Tungufljóti veiðist stundum lítið þar fyrr en fer að líða vel á september enda um langan veg fyrir sjóbirtinginn að fara, en í kjölfar Grímsvatnagossins árið 2010 hefði rennslið í stóru jök­ulán­um Hverf­is­fljóti, Skeiðará, Gígju­kvísl og Núpsvötn­um breyst og eiga nú allar sam­eig­in­leg­an ós. Ekki er þó að sjá að þær breytingar rugli sjóbirtinginn í ríminu á leið sinni til æskustöðvanna. 

Þá hafa heyrst fréttir af mjög góðri veiði í Vatnamótunum svokölluðu, þar sem bergvatnsárnar Geirlandsá, Fossálar, Hörgá og fleiri ár sameinast Skaftá. Þar heyrðist af hópi veiðimanna sem veiddi 240 birtinga á nokkrum dögum undir lok ágúst, en þar má veiða á fimm stangir. Ekki er vitað hvort nýafstaðið Skaftárhlaup hafi haft mikil á áhrif á veiðina, en hlaupið reyndist í allra minnsta lagi, en gæti hafa hreyft við fiskinum upp í bergvatnsárnar að sögn kunnugra.

• Blogga um frétt

Seinustu hundraðkallar sumarsins