Laxveiðin byrjaði ágætlega á Norðausturlandinu, en svo dró úr henni þegar leið á enda kom í ljós að lítið af smálaxi skilaði sér úr hafi.
Síðustu dagar hafa verið fremur erfiðir á þessum slóðum vegna mikillar rigningar og árnar orðnar bólgnar af vatni, auk þess sem lofthiti hefur verið lítill. Næstu daga spáir hins vegar skaplegra veðri og því gæti veiðin tekið kipp síðustu daga veiðitímans en veiði lýkur á flestum stöðum rétt eftir 20. september.
Í Deildará á Sléttu, skammt við Raufarhöfn, eru komnir 210 laxar á land í heildina sem leigutakar segja ásættanleg veiði, þó verri veiði en í fyrra þegar 303 komu á land. Í næsta nágrenni, í Ormarsá , eru komnir 440 í bók og náði síðasta þriggja daga holl þar 11 löxum á þurrt við erfið skilyrði. Þetta er mun verri veiði en í fyrra þegar 851 lax veiddist og reyndist metveiði. Stærsti laxinn til þessa er 101 cm.
Í Svalbarðsá í Þistilfirði eru um 350 laxar komnir á land sem er svipað og í Sandá þar sem veiði hefur verið fremur róleg þar eftir góða byrjun fram eftir júlí. Í báðum þessum ám var metveiði í fyrra og veiddust í Sandá 531 og Svalbarðsá 738.
Þá er samkvæmt síðustu fréttum búið að skrá 128 laxa úr Hölkná þar sem veitt er á tvær stangir en skilyrði til veiði að undanförnu hafa verið erfið vegna vatnavaxta. Þetta er aðeins undir meðalveiði síðustu ára. Stærsti laxinn það sem af er er 101 cm sem veiddist á efsta veiðstað upp við Geldingafoss.
Samkvæmt upplýsingum frá Marinó Jóhannssyni, á Tunguseli við Hafralónsá, hefur veiðin verið döpur þar í sumar eins og í fyrra. Marinó sagði rétt rúmlega 200 laxa komna á land og sagðist hann telja að mikil afföll hafi orðið á niðurgönguseiðum í kjölfar vorkulda síðustu ára og það væri skýring á dapri veiði í ár.
Marinó sagði að mikill snjór hafi hlaðist upp á hálendinu síðustu árin og miklir vatnavextir og leysingar staðið langt fram á sumar. Hafralónsá er stærsta vatnsfallið sem fellur í Þistilfjörð og það tæki stærri árnar nánast allt sumarið að bræða þennan mikla snjó og því væri vatnshiti lægri fyrir vikið og fæðuframboð fyrir seiðin ekki nægjanlega gott. Vísaði Marínó til þess að svipað ástand sé búið að vera í Selá og Hofsá í Vopnafirði sem væru vatnsföll af svipaðri stærð og Hafralónsá.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |