Stórlax á land úr Breiðdalsá

Þó að langt sé komið fram í september er ennþá veitt í Breiðdalsá þó ástundun hafi ekki verið mikil að undanförnu. Fram kemur á vef Strengja sem heldur utan um veiðileyfi í ánni þar hafi á sunnudaginn stórlaxi verið landað.

Það mun hafa verið Sigurður Guðmundsson sem var að veiða í Breiðdalsá í fyrsta skipti og veiddi 108 cm hæng á Þýska snældu í Tinnudalsá við ármót Gilsár.  Sigurður skrifar um þetta inn á facebook síðu Strengja og þar kemur fram að hann hafi verið einn á ferð og tekist að landa þeim stóra eftir klukkutíma og tuttugu mínútur.  Hafi laxinn verið 108 cm og 62,5 cm í ummál

Fram kom hjá Sigurði að hann sé búinn að veiða í 35 ár og beðið lengi eftir að ná laxi yfir 20 pund þar til í sumar að hann hafi náð að landa tveimur til viðbótar við þennan stóra.

Að öðru leyti hefur veiði verið fremur róleg í Breiðdalsá í sumar og rúmir 370 laxar komnir á land og ekki ólíklegt að hún fari vel yfir 400. 

Þá kemur fram að um 600 laxar séu komnir á land af Jöklusvæðinu, en Jökulsá sjálf fór á yfirfall í lok ágúst og lítið veitt í henni. Hins vegar sé veitt í hliðaránum og fengu veiðimenn 9 laxa á tvær stangir fyrir stuttu síðan í einni af hliðaránum.

Þá hefur urriðaveiði í Minnivallalæk verið betri en mörg undanfarin ár og heildarveiðitölur að nálgast 400 fiska og eins áður hafa margir vænir fiskar komið þar á land í sumar. 

Þá er greint  frá því að það stefni í ágætis sumar í Hrútafjarðará og nálægt 500 laxar komnir á land það sem af er sumri.  Hafa komið ágætis skot þegar aðstæður hafa verið í lagi í ánni varðandi vatnsmagn.  Hópur veiðimann var með 44 laxa í síðustu viku eftir tveggja daga veiði þegar áin var að sjatna eftir flóð, en veitt er á þrjár stangir í ánni.

• Blogga um frétt

Seinustu hundraðkallar sumarsins