Stærsti lax Danmerkur

Fram kemur á fréttasiðu TV2 í Danmörku að stærsta laxi í sögu Danmerkur hafi verið landað í dag í Storåen við Holstebro á Jótlandi.

Það var Simon Kastup Shimizu, 23 ára nemandi í VIA háskólanum í Holstebro sem tók sér einn dag í frí frá námi til að veiða í ánni og veiddi 141 cm hæng sem er stærsti lax sem veiðst hefur í Danmörku.

Í samtali við TV2 segir Simon að hann hafi haft sterklega á tilfinningunni að eitthvað myndi bíta á hjá honum í dag þó svo vindurinn hafi gnauðað í Holstebro og það var svo síðdegis að hann fékk mikla og þunga töku á spún og gerði hann sér strax grein fyrir því að um mjög stóran lax var að ræða.  Mikil glíma átti sér stað eftir bökkunum við ánna þar sem hún rennur í miðri Holstebro og á meðan bardaganum stóð náði Simon að hringja í Bjarke bróður sinn sem kom honum fljótlega til aðstoðar.

Það var svo 20 til 30 mínútum eftir að Bjarke kom að þeir náðu í sameiningu að landa laxinum stóra sem reyndist hængur sem var gríðarlega breiður að sögn bræðranna en mældist 142 cm á lengdina.  Var honum sleppt aftur út í ánna að viðureigninni lokinni eins og reglur kveða á um og kvaðst Simon rétt hafa náð að segja takk fyrir viðureignina áður en hann sá sporðinn hverfa ofan í ánna. 

Þarna sló Simon 62 ára gamalt met D C Dinesen frá Kaupmannahöfn sem árið 1954 veiddi 136 cm lax úr ánni Skjern sem er talsvert sunnan við Holstebro á Jótlandi.

• Blogga um frétt

Seinustu hundraðkallar sumarsins