Vatnsdalsá í Húnavatnssýslu opnaði í eftirmiðdaginn í gær og urðu veiðimenn varir við lax upp um alla á. Aðstæður voru hins vegar veiðimönnum erfiðar.
Að sögn Péturs Péturssonar, leigutaka árinnar, brast á mjög stíf suðaustan átt þegar veiðimenn voru að gera sig klára til að hefja veiðar síðdegis í gær þannig að vönustu veiðimenn áttu stökkustu vandræðum með fluguköstin jafnvel þó tvíhendur væru notaðar. Við þessar aðstæður rótast mikið grugg upp úr Flóðinu og er áin kolmórauð þar fyrir neðan sem hefur slæm áhrifa á þekkta veiðistaði eins og Hnausastreng og Hólakvön.
Þrátt fyrir þessar aðstæður þá komu fjórir laxar á land fyrstu vaktina, tveir úr Hnausastreng, einn úr Hólakvörn og sá fjórði úr Torfhvammshyl sem er mjög ofarlega í Forsæludal og var sá með halalús. Sá stærsti var 99 cm hængur úr Hnausastreng, en hinir þrír voru allir yfir 80 cm.
Þá settu menn í lax víða um ána og meðal annars í Álku sem er tveimur vikum á undan áætlun í venjulegu ári að sögn Péturs.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |