Þyrla LHG stendur veiðiþjófa að verki

Fram kemur á vefsíðu Landhelgisgæslunnar að þyrla hafi síðastliðið laugardagskvöld farið í eftirlitsflug um norðan- og vestanvert landið í þeim tilgangi að hafa laxa- og silungaveiðieftirlit á þekktum stöðum.

Í lögum númer 61 frá árinu 2006 um lax- og silungsveiði er skýrt kveðið á um að ekki megi veiða lax í sjó og um göngusilung er sérstaklega tiltekið að hann skuli friðaður gegn allri veiði 84 klukkustundir í viku hverri og megi aldrei veiða í net frá klukkan 22:00 á föstudagskvöldi fram til klukkan 10:00 á þriðjudagsmorgni.

Fram kemur að TF-GNA fór í loftið frá Reykjavíkurflugvelli um klukkan hálfátta og um borð voru auk áhafnar tveir veiðieftirlitsmenn frá Fiskistofu. Á fyrsta viðkomustaðnum norður í landi sáust úr þyrlunni mannaferðir í fjörunni og tvær línur út í sjó. Teknar voru afstöðumyndir þar sem sjá mátti fólk draga net. Þyrlunni var lent og fóru eftirlitsmennirnir og stýrimaður þyrlunnar til viðræðna við fólkið. Aflinn og veiðarfæri voru gerð upptæk. Fólkið á líklega yfir höfði sér kæru vegna ólöglegra veiða. 

Að þessu búnu hélt svo þyrlan áfram leið sinni. Voru fleiri staðir á Norðurlandi skoðaðir, svo og í Ísafjarðardjúpi, á Ströndum og við Breiðafjörð. Þyrlan lenti svo á Reykjavíkurflugvelli um klukkan hálfeitt.

Í lokin kemur fram að Landhelgisgæslan og Fiskistofa, sem sinna eftirliti með lax- og silungsveiðum, hvetja fólk til að kynna sér vel þau lög og reglur sem gilda um þessar veiðar.

Nánar má kynna sér þessi lög hér.

• Blogga um frétt

Seinustu hundraðkallar sumarsins