Vikuleg samantekt á laxveiðinni

Vikuleg samantekt Landssambands veiðifélaga á veiði í laxveiðiám á landinu birtist í gærkvöldi. Eins og áður hefur Ytri-Rangá gefið langmestan afla en eitthvað hefur þó dregið þar úr veiði undanfarið.

Í Ytri-Rangá er heildarveiðin komin í 4.218 laxa og var veiðin í síðustu viku 472 laxar, en í vikunni þar áður veiddust 872 laxar. Talvert langt er í Miðfjarðará sem er komin í 2.668 laxa en þar veiddust 282 laxar í liðinni viku og er hún langefst af sjálfbæru laxveiðiánum.

Norðurá í Borgarfirði bættist í hóp veiðiáa sem komnar eru yfir heildarveiði síðasta sumars en þar veiddust þó aðeins 53 laxar í liðinni viku og þar virðist kominn haustbragur á veiðina til viðbótar við vatnsleysi sem margar veiðiár víða um land líða fyrir þessa dagana.  Haustrigningar gætu hleypt miklu lífi í veiðina víða áður en veiðitímabili lýkur í september.

Áður voru nokkrar veiðiár komnar með meiri veiði en allt síðasta sumar og má þar nefna Grímsá, Elliðaárnar, Laxá á Ásum, Norðlingafljót og Straumarnir við Hvítá í Borgarfirði.

Vikulistinn yfir 10 efstu árnar lítur þannig út:

1. Ytri-Rangá 4.218 laxar - vikuveiði 472 laxar.
2. Miðfjarðará 2.668 laxar - vikuveiði 282 laxar.
3. Þverá/Kjarrá 1.777 laxar - vikuveiði 177 laxar.
4. Eystri Rangá 1.685 laxar – vikuveiði 284 laxar.
5. Blanda 1.390 laxar - vikuveiði 59 laxar.
6. Norðurá 1.355 laxar - vikuveiði 53 laxar.
7. Langá á Mýrum 1.237 laxar - vikuveiðin 88 laxar.
8. Haffjarðará 1.033 laxar – vikuveiði 53 laxar.
9. Grímsá í Borgarfirði 918 laxar – vikuveiði 74 laxar
10. Selá í Vopnafirði 813 laxar – vikuveiði 128 laxar

Nánar má kynna sér þennan lista hér.

• Blogga um frétt

Seinustu hundraðkallar sumarsins