Tveir risar á land úr Víðidalsá

Haustið er oft tími stórlaxanna enda hafa margar fréttir borist síðustu daga af hverjum stórlaxinum á fætur öðrum víða um land.  Danski stórlaxahrellirinn, Nils Folmer Jorgensen, landaði tveimur risalöxum úr Víðidalsá í dag þar sem nú eru veiddir síðustu dagar sumarsins.

Fram kemur hjá Nils í færslu á facebook í kvöld að hann hafi verið á neðsta svæðinu í Víðidalsá í morgun en þar eru meðal annars tveir þekktir stórlaxastaðir, Dalsárós og Harðeyrarstrengur.

Eftir að hafa misst stóran fisk í Dalsárósi og landað svo 86 cm hrygnu þá ákvað Nils að reyna aftur við hylinn. Þar setti hann í gríðarlegan lax sem rauk með offorsi úr hylnum og var landað á næsta veiðistað fyrir neðan og reyndist þar á ferðinni vera hængur sem mældist 106 cm langur og 56 cm að ummáli.  Var hér um að ræða stærsta lax úr ánni í sumar, en þar með er ekki öll sagan sögð.

Við svo búið færði Nils sig litlu ofar á svæðinu á stað sem heitir Harðeyrarstrengur. Rétt fyrir hádegishlé setti hann svo í annan risa fisk sem tók fluguna Radian og eftir mikill átök tókst, Jóhanni Hafnfjörð Rafnssyni, leigutaka árinnar, að koma háfnum undir laxinn.  Reyndist þá þarna vera 111 cm hrygna sem var 57 cm að ummáli. Fram kom hjá Nils að fiskurinn var svo þungur að erfitt var að halda á honum fyrir myndatökuna.

Þar með var þessi bústna hrygna orðinn stærsti lax vertíðarinnar í Víðidalsá og auk stærsti lax sem veiðst hefur á landinu í sumar, en Árni Pétur Hilmarsson veiddi jafn langan lax í Laxá í Aðaldal fyrir nokkrum dögum en sá var einum sentímetranum minni að ummáli.

Jóhann Hafnfjörð Rafnsson

• Blogga um frétt

Seinustu hundraðkallar sumarsins