Urriðadans á laugardag í Öxará

Á vefsíðu Þjóðgarðsins á Þingvöllum kemur fram að hinn árlegi Urriðadans í Öxará verði næstkomandi laugardag en þá mun Jóhannes Sturlaugsson hjá rannsóknarfyrirtækinu Laxfiskum fræða gesti þjóðgarðsins um lífshætti Þingvallaurriðans.

Fram kemur í tilkynningu að kynning muni hefjast klukkan 14:00 og fer fram á bökkum Öxarár. Byrjar gönguferðin við bílastæðið þar sem Hótel Valhöll stóð eitt sinn og er merkt P5. Gengið er með ánni upp að Drekkingarhyl þar sem risaurriðinn og aðrir minni verða skoðaðir og fjallað um lífshætti þeirra.

Gert er ráð fyrir því að kynningin taki um eina og hálfa klukkustund og fá gestir tækifæri til að sjá risaurriðann í návígi og fræðast um þennan stórhöfðingja Þingvallavatns sem á hverju hausti gengur upp Öxará til hrygningar.

• Blogga um frétt

Seinustu hundraðkallar sumarsins