Veiði lokið á svæðum Stangveiðifélag Akraness

Stangveiðifélag Akraness hefur nokkur veiðisvæði á sínum snærum og þar er nú veiði lokið þetta sumarið.

Fram kemur að lítil fiskgengd var í sumar upp á efra vatnasvæði Laxár í Leirársveit fyrir ofan Eyrarfoss og hafði það áhrif á veiðina í árstubbunum á milli vatnanna þriggja í Svínadal sem félagið hefur á leigu. Í gegnum teljarann í laxastiganum í Eyrarfossi gengu í sumar 484 laxar, þegar búið er að draga frá laxa sem gengu aftur niður teljarann. Alls veiddust í sjálfri Laxá 624 laxar þetta sumarið sem er varla nema bærileg veiði, en þó mun betri en í fyrra þegar 441 komu á land.

Tvær ár renna á milli vatnana í Svínadal.  Sú neðri sem er milli Eyrarvatns og Þórisstaðavatns heitir Selós og þar veiddust 12 laxar í sumar og þar var einnig ágæt urriðaveiði. Efri áin heitir Þverá og er á milli Þórisstaðavatns og Geitabergsvatns og þar veiddust 9 laxar og eitthvað af urriða.

Þá lauk veiði í Fáskrúð í Dölum þann 30. september, en félagið leigir hana á móti Stangveiðifélagi Reykjavíkur. Þar urðu lokutölur 209 laxar sem er sambærileg við veiðina sumarið 2016 þegar 220 laxar veiddust. Sumarið var þurrt í Dölunum og hafði það áhrif á veiðina og veiddist best í haustrigningunum í september og komu þá 99 laxar á land. Í júlí veiddust 54 og 54 í ágúst.

Einnig hefur félagið haft hlutdeild í leigu á Andakílsá í Borgarfirði, en þar var ekkert veitt í sumar vegna umhverfisslys í maí síðastiðinn þegar að aurflóð kom í ána.

• Blogga um frétt

Seinustu hundraðkallar sumarsins