Erfðafræði Atlantshafslax kortlögð

Inn á vef Hafrannsóknarstofnunar er greint frá vísindagrein sem birtist í riti, ICES Journal of Marine Science, um viðamikla rannsókn á erfðafræði Atlantshafslax.

Fram kemur í greininni að laxar í 13 Evrópulöndum hafi verið rannsakaðir og notuð 14 erfðamörk. Sýnum úr 26.822 fiskum var safnað af 467 stöðum í 282 vatnakerfum. Tveir íslenskir vísindamenn eru meðal höfunda í þessari grein, þeir Sigurður Guðjónsson, forstjóri Hafrannsóknastofnunar, og Kristinn Ólafsson, sem starfaði hjá Matís.

Meðal annars leiddu gögnin í ljós að íslenskur lax er fjarskyldur öðrum evrópskum laxastofnum. Annars staðar í álfunni greinist laxinn í tvo meginhópa, norðurhóp og suðurhóp. Síðan er hægt að greina lax í erfðahópa eftir svæðum. Með þessum gögnum er unnt að rekja lax sem veiðist í sjó til síns heima, annað hvort eftir landsvæði eða jafnvel til ákveðinnar áar.

Íslenskur lax skiptist einnig í hópa. Þar eru tveir meginhópar, annar á Norðurlandi, hinn á Vesturlandi. Líklegt er að lax á Suðurlandi myndi þriðja hópinn, en frekari rannsókna er þörf til að staðfesta það. Í flestum laxveiðiám landsins er sérstakur stofn.

• Blogga um frétt

Seinustu hundraðkallar sumarsins