Dótturfyrirtæki Teymis í Danmörku, Teymi A/S, hefur skrifað undir samning við sænska fjarskiptarisann Telia um rekstur og þjónustu í tengslum við viðskiptalausnina Oracle e-Business Suite. Telia er stærsti viðskiptavinur Oracle í Danmörku og einn sá stærsti á Norðurlöndum "og því er um mikilvægan samning að ræða fyrir Teymi sem um þessar mundir er að hasla sér völl í Danmörku sem sérhæft þjónustufyrirtæki á sviði Oracle-lausna," segir í frétt frá Teymi. Þrjú af fimm stærstu fjarskiptafyrirtækjum Danmerkur eru nú meðal viðskiptavina Teymis A/S. Hörð samkeppni

Samkvæmt upplýsingum Teymis var hörð samkeppni um samninginn við Telia og meðal þeirra þeirra fyrirtækja sem kepptust um að ná honum voru risar á danska UT-markaðnum eins og Oracle, Consit og WM-data sem er stærsta hugbúnaðarfyrirtæki Norðurlanda.

"Ástæða þess að Teymi varð fyrir valinu er fyrst og fremst sú að Telia leit svo á að Teymi væri eini aðilinn á danska markaðnum sem gæti boðið sambærilega þjónustu og Oracle Corporation. Þar skipti sköpum sú reynsla og þekking sem Teymi á Íslandi býr yfir," segir í tilkynningu Teymis.

Þar segir ennfremur: "Telia er þriðja fjarskiptafyrirtækið í Danmörku sem semur við Teymi A/S og eru nú þrjú af fimm stærstu fjarskiptafyrirtækjum Danmerkur meðal viðskiptavina Teymis. Áður hafði Teymi samið við TDC Kabel TV, áður TeleDanmark, og Debitel sem er fimmta stærsta fjarskiptafyrirtæki Danmerkur.

Áætlanir gera ráð fyrir að velta Teymis A/S á árinu 2002 verði rúmar 300 milljónir. Fjöldi starfsmanna Teymis A/S er nú um 20. Styrkur Teymis A/S liggur fyrst og fremst í reynslu og þekkingu Teymis á Íslandi. Enn fremur hefur sérstaklega vel tekist til við mönnun Teymis A/S, en fyrirtækið er fyrst og fremst skipað dönskum Oracle-sérfræðingum. Teymi A/S nýtur þeirrar sérstöðu á danska upplýsingatæknimarkaðnum að vera eina fyrirtækið fyrir utan Oracle Corporation sem sérhæfir sig á sviði Oracle-tækni. Teymi A/S er í 100% eigu Teymis hf á Íslandi.

Teymi hf var stofnað árið 1995 og hefur fyrirtækið stækkað ört síðan. Í dag er fjöldi starfsmanna um 70 og er fyrirtækið með starfsemi í tveimur löndum; Íslandi og Danmörku. Teymi er helsti sölu- og þjónustuaðili Oracle-hugbúnaðar á Íslandi. Oracle Corporation er annar stærsti hugbúnaðarframleiðandi heims. Flest af stærstu fyrirtækjum landsins eru meðal viðskiptavina Teymis. Sérstakir Oracle-samstarfsaðilar Teymis í hugbúnaðariðnaði eru um þrjátíu talsins."