Það vekur athygli danskra fjölmiðla að um leið og flestar danskar stórverslanir skera niður séu hinir íslensku eigendur Magasin að spenna bogann. Í Børsen er haft eftir Jóni Ásgeiri Jóhannessyni og Birgi Þór Bieltvedt að meðal annars sé í skoðun að stofna Magasin-verslanir í Svíþjóð og jafnvel að breyta Debenhams-verslunum Baugs í Stokkhólmi og í verslunarmiðstöðinni Fields í Kaupmannahöfn. Í samtali við Berlingske Tidene segir Jón Ásgeir að með sameiginlegum innkaupum Magasin og Debenhams sé hægt að lækka útgjöld Magasin verulega sem sé fyrsta skrefið í áttina að því að breyta Magasin í arðbært fyrirtæki.