Íslendingarnir sem keypt hafa 83% hlut í dönsku verslanakeðjunni Magasin, og stefna að því að kaupa hana alla, höfðu áður kannað möguleg kaup á keðjunni en horfið frá. En þeir stóðust ekki mátið þegar Magasin bauðst á 4,8 milljarða króna, segir í viðskiptafréttum Berlingske Tidende í dag.

Þrír íslenskir aðilar keyptu keðjuna, Baugur Group, Straumur fjárfestingabanki og B2B Holdings.

Jón Ásgeir Jóhannsson, forstjóri Baugs, segir í samtali við Berlingske að fyrir tveim árum hafi Magasin haft samband við Baug í tengslum við fréttir af því að fyrirtækið ætlaði að opna Debenhams-verslun í Danmörku. Þá hafi Baugur grannskoðað Magasin, en niðurstaðan orðið sú að ekki væru forsendur fyrir því að kaupa keðjuna.

„En síðan þá hefur efnahagsástandið farið að batna og í september fórum við að kanna málin betur,“ er haft eftir Jóni Ásgeiri.

Blaðið segir hann ekki draga dul á með kaupunum komi íslensku fjárfestarnir höndum yfir eignir Magasin, sem séu meira virði en nemur kaupverðinu á keðjunni.

Þá hefur blaðið eftir fjármálastjóra Baugs, Stefáni Hilmarssyni, að þótt rekstur Magasin gangi ekki sérlega vel einmitt núna hafi verðið verið mjög hagstætt.

Magasin var stofnað árið 1868 og rekur nú 8 deildarskiptar stórverslanir, sú þekktasta á Kóngsins Nýjatorg í hjarta Kaupmannahafnar en einnig eru verslanir í Álaborg, Óðinsvéum og Árhúsum og er velta þeirra samtals um 30 milljarðar íslenskra króna, samkvæmt upplýsingum Kauphallar Íslands.