Stjórn sparisjóðs Hafnarfjarðar hefur sent frá sér yfirlýsingu þar sem fram kemur m.a. að Stjórn SPH telji það af hinu góða ef öflugir fjárfestar hafa áhuga fyrir sparisjóðnum og séu reiðubúnir til að fjárfesta í stofnfé hans. Þá sé það vilji þeirra manna sem tóku við stjórn SPH hinn 20. apríl s.l. að fjölga stofnfjáraðilum. Til þess þurfi hins vegar stuðning 2/3 hluta atkvæða á aðalfundi og þann styrk hafi stjórnin ekki í stofnfjáraðilahópnum.

Fréttatilkynning stjórnarinnar fer hér á eftir í heild sinni:

Undanfarna daga hafa málefni Sparisjóðs Hafnarfjarðar mikið verið til umfjöllunar í fjölmiðlum og þá einkum hugsanleg sala á stofnfé sparisjóðsins. Það hefur ekki verið venja þeirra sem farið hafa með stjórn SPH að ræða málefni sjóðsins, einstakra stofnfjáraðila, viðskiptamanna eða starfsmanna í fjölmiðlum. Vegna hinnar háværu umræðu, alvarlegra ásakana í garð stjórnarmanna og annarra, auk kviksagna sem hafa verið á kreiki í bæjarfélaginu, telur stjórn SPH þó nauðsynlegt að breyta frá þessari venju nú og koma örfáum athugasemdum á framfæri.

Lögum um sparisjóði hefur verið breytt undanfarin ár og meðal annars ákveðið að sparisjóðir skyldu hafa ákveðið lágmarks stofnfé, sem selt yrði og að sjóðunum yrði stjórnað af eigendum þessa stofnfjár. Jafnframt var í lögunum ákveðið að þeir sem verið höfðu í ábyrgð fyrir sjóðina ættu rétt á því að breyta ábyrgðum sínum í stofnfé. Á þeim tíma voru ábyrgðarmenn SPH 27 en vegna krafna laganna um lágmarksfjölda ábyrgðarmanna var þeim þá fjölgað nokkuð. Lítil fjölgun hefur verið í hópi stofnfjáraðila síðustu ár en þeir eru nú 47. Var það eindregin afstaða fyrri stjórnar sjóðsins að fjölga ekki stofnfjáraðilum og fara ekki þá leið að bjóða starfsmönnum og mikilvægum viðskiptavinum að kaupa stofnfé í SPH.

Sparisjóður Reykjavíkur og nágrennis, Sparisjóður vélstjóra, Sparisjóður Kópavogs og Sparisjóðurinn í Keflavík fóru allir þá leið eftir lagabreytinguna að margfalda fjölda stofnfjáreigenda í sjóðunum og voru þeir t.d. þegar flest var u.þ.b. 1.200 í SPRON, tæplega 700 í SPV og rúmlega 600 í SPKef. Viðskipti hafa verið fjörleg með stofnfé í þessum sjóðum og hefur t.a.m. meira en helmingur alls stofnfjár í SPRON skipt um eigendur á allra síðustu misserum. Engin höft eru á viðskiptum með bréf í þessum sjóðum en þau eru háð samþykki stjórnar samkvæmt lögum. Engin viðskipti hafa nokkru sinni verið með stofnbréf í SPH þrátt fyrir margítrekaðar óskir um kaup á bréfum, þ.á.m. frá starfsmönnum.

Til þess er þetta rakið að vekja athygli á þeirri sérstöðu sem verið hefur með stofnfjáreignina í Sparisjóði Hafnarfjarðar en hún skýrir væntanlega þá athygli sem fréttir um hugsanlega sölu stofnbréfa nú hefur vakið á sama tíma og það hefur enga athygli vakið að stærsti sparisjóður landsins hefur skipt um eigendur.

Það er vilji þeirra manna sem tóku við stjórn SPH hinn 20. apríl s.l. að fjölga stofnfjáraðilum. Til þess þarf hins vegar stuðning 2/3 hluta atkvæða á aðalfundi en þann styrk hefur stjórnin ekki í stofnfjáraðilahópnum. Það var jafnframt afstaða hinnar nýju stjórnar að standa ekki í vegi fyrir því ef stofnfjáraðilar vildu framselja bréf sín. Slík beiðni hefur ekki borist stjórninni. Berist slík beiðni verður hún að sjálfsögðu tekin fyrir og fullnægi hún skilyrðum laga mun sitjandi stjórn væntanlega taka hana til greina.

Með hliðsjón af þeirri þróun sem orðið hefur hjá þeim fjórum sparisjóðum sem farið hafa út í það að auka stofnfé sitt og setja viðskipti með stofnbréf jafnframt frjáls er ekkert óeðlilegt við það að fjárfestar sýni bréfum í SPH áhuga. Stjórn SPH telur það af hinu góða ef öflugir fjárfestar hafa áhuga fyrir sparisjóðnum og eru reiðubúnir til að fjárfesta í stofnfé hans. SPH þarf á því að halda að nýir og öflugir einstaklingar komi að stjórn sjóðsins og rekstri.

Hafnarfirði, 24. júní 2005
f.h. stjórnar Sparisjóðs Hafnarfjarðar
Páll Pálsson, formaður