FJÁRMÁLAEFTIRLITIÐ (FME) hefur komist að þeirri niðurstöðu að stofnast hafi óbeinn virkur eignarhlutur tiltekinna aðila í Sparisjóði Hafnarfjarðar á seinasta ári (SPH). FME tilkynnti stjórn sparisjóðsins þetta 20. febrúar sl. og jafnframt að eftirlitið hefði tekið ákvörðun um að tilteknir stofnfjáreigendur megi ekki fara sameiginlega með meira en 5% atkvæðisréttar í sparisjóðnum að því er fram kemur í gögnum, sem Morgunblaðið hefur undir höndum.

Annars vegar er um að ræða fimm einstaklinga sem ekki mega fara saman með meira en 5% í sparisjóðnum og hins vegar tvö fyrirtæki sem sett eru sömu mörk. "Líkur benda einnig til þess að fleiri aðilar falli undir virkan eignarhlut í sparisjóðnum og atkvæðistakmörkun samfara því," segir í bréfinu.

Athugun á hæfi stjórnarmanna

Fór FME fram á það 20. febrúar að stjórn SPH frestaði aðalfundi sem boðaður var 21. febrúar um ótiltekinn tíma m.a. með vísan til þess að FME hefði ákveðið að taka til athugunar hæfi tiltekinna stjórnarmanna til þess að sitja í stjórn sparisjóðsins. Aðalfundurinn var eftir sem áður haldinn og var ný stjórn kjörin á þeim fundi.

Í bréfi FME til SPH kemur einnig fram að eftirlitið gerði þá kröfu í nóvember sl. að stjórn sparisjóðsins samþykkti engin frekari framsöl stofnfjárbréfa í sparisjóðnum þar til FME hefði lokið athugun sinni á hvort myndast hefði virkur eignarhluti í sparisjóðnum. Þá kröfu hafi stjórn SPH virt að vettugi.

Í bréfi FME til stjórnar sparisjóðsins segir m.a.: "Þá hefur stjórn sparisjóðsins virt að vettugi kröfu Fjármálaeftirlitsins um að samþykkja ekki frekari framsöl í sparisjóðnum á meðan athugun eftirlitsins stæði, sbr. bréf stjórnar sparisjóðsins til Fjármálaeftirlitsins, dags. 10. febrúar sl. er barst eftirlitinu 14. febrúar sl. Samþykkti stjórnin framsöl á 49 stofnfjárbréfum auk þess sem gerð var grein fyrir því að til stæði að samþykkja framsalsbeiðni vegna 4 stofnfjárbréfa. Samtals er um 53 stofnfjárbréf að ræða af 93 í sparisjóðnum. Eftirlitið hefur einnig til skoðunar hvort tilteknir aðilar sem samþykktir voru sem nýir stofnfjáreigendur á stjórnarfundi 10. febrúar sl. tengjast myndun virks eignarhlutar í sparisjóðnum."

Boðuðu ákvörðun um févíti

17. febrúar tilkynnti FME stjórn SPH fyrirhugaða ákvörðun eftirlitsins um að lagt verði févíti allt að tveimur milljónum kr. á sparisjóðinn "þar sem brotið hafi verið gegn áðurnefndri ákvörðun Fjármálaeftirlitsins" um að engin frekari framsöl í sparisjóðum yrðu samþykkt. Var stjórninni gefinn frestur til kl. 15 í gær til að koma sjónarmiðum sínum á framfæri vegna þessa.

FME hefur allt frá sl. sumri haft viðskipti með stofnfé í SPH til athugunar og hvort virkur eignarhlutur hafi myndast í sjóðnum í andstöðu við ákvæði laga. Hóf efnahagsbrotadeild ríkislögreglustjóra rannsókn á viðskiptunum í byrjun þessa árs.