CreditSights segir minni áhættu í rekstri Glitnis en hinna viðskiptabankanna
Þetta er meðal þess sem fram kemur í nýrri skýrslu CreditSights um Glitni.
Ekki gerður greinarmunur á bönkunum á óvissutímum
Sérfræðingar CreditSights telja að færa megi rök fyrir því að eðlilegt sé að vaxtálag á skuldabréfum bankans sé lægra en á skuldabréfum hinna íslensku bankanna en þeir taka jafnframt fram að ef upp komi veruleg óvissa um fjárhagslegan styrk íslensku bankanna sé ólíklegt að markaðurinn geri mikinn greinarmun á þeim.Bent er á að vaxtaálagið á skuldabréfum Glitnis geti sýnst vænlegt í augum fjárfesta að gefnu lánshæfismati Moody´s á bankanum sem sé A1 en að mati sérfræðinga CreditSights er lánshæfismatið of hátt. Þeir benda í þessu sambandi á að enda þótt Glitnir sé ekki nærri því eins háður hlutabréfamarkaðinum geti niðursveifla á honum og/eða vandræði við lánsfjármögnun gert það að verkum að vaxtaálagið sé ekki nægjanlega hátt, jafnvel þótt það hafi hækkað verulega að undanförnu.
Aftur á móti er tekið fram að öfugt við bæði Kaupþing banka og Landsbanka hafi Glitnir dregið úr vægi hlutabréfa í eignasafni sínu og sé ekki með eins mikla útlánastarfsemi utan Íslands heldur hafi einbeitt sér að ákveðnum atvinnugreinum í Norður-Evrópu, m.a. í sjávarútvegi, jarðhita og þjónustu við olíufyrirtæki. En þótt þetta geti talist rökrænt skref hjá Glitni vegna þekkingar bankans á þessum greinum á Íslandi eru sérfræðingar CreditSights ekki vissir um að bankinn hafi samkeppnisforskot á þessum sviðum.
CreditSights getur þess sérstaklega að Glitnir sé einn þeirra banka í Evrópu, sem samkvæmt þeirra eigin útreikningum hafi skilað mestri arðsemi eigin fjár eða 37% fyrir skatta en 35% samkvæmt útreikningum CreditSigths. Bankinn hafi náð miklum árangri á skömmum tíma og svo lengi sem markaðsaðstæður séu hagstæðar og lánakjör fari ekki út fyrir öll viðráðanleg mörk eigi bankinn að geta skilað góðri afkomu. Þá sé það sérstaklega jákvætt að verðbréfaviðskipti og gengishagnaður séu hlutfallslega miklu minna af tekjum Glitnis en hinna íslensku viðskiptabankanna.
Hagur Þáttar af kaupunum á Sjóvá óljós
Í skýrslu CreditSigths er í alllöngu máli gerð grein fyrir eignarhaldi á Glitni og þeim breytingum sem orðið hafa á því og aðaleigendum þess nú. Tekið er fram að enda þótt íslensku bankarnir fullvissi menn um að öll viðskipti séu á milli óskyldra aðila og séu undir eftirliti Fjármálaeftirlitsins sé stundum erfitt að réttlæta sum viðskipti milli tengdra aðila.Þannig benda sérfræðingar CreditSigths á að Glitnir (Íslandsbanki á þeim tíma) hafi selt 2/3 hluta í Sjóvá til Þáttar, sem sé að mestu í eigu Milestone, sem þá hafi verið einn af aðaleigendum bankans og sé nú stærsti einstaki hluthafinn. Tekið er fram að Íslandsbanki hafi keypt Sjóvá árið 2003 og hafi fengið um 3,3 milljarða í söluhagnað við söluna á 2/3 hlutum Sjóvár til Þáttar. Bankinn hafi útskýrt söluna á þann hátt að hann hafi viljað losa um fé til annarra fjárfestinga. Erfiðara sé hins vegar að meta hvað hag Milestone hafi haft af því að eiga Sjóvá þótt salan hafi hins vegar verið hagstæð fyrir Íslandsbanka. Bankinn hafi meira eða minna haldið sömu tengslum við Sjóvá, þ.e. með því að selja tryggingar í útibúum sínum en losað um mikið fé og hafi aukið útlánagetu sína með sölunni um 200 milljarða íslenskra króna, auk þess sem bankinn hafi með henni minnkað hlutabréfaáhættu sína. Bent er á að Íslandsbanki hafi sjálfur fjármagnað ótilgreindan hluta viðskiptanna, og að tengslin milli Sjóvár og Glitnis séu enn mjög sterk; Einar Sveinsson, stjórnarformaður Íslandsbanka, sé fyrrverandi forstjóri Sjóvár, Karl Wernersson aðaleigandi Þáttar og Milestone sé stjórnarformaður Sjóvár eins og við megi búast og Bjarni Ármannsson, forstjóri Glitnis, sé varaformaður.
