Glitnir banki hf hefur selt allan sinn hlut í tryggingafélaginu Sjóvá í kjölfar tilboðs, sem bankanum barst í 33,4% hlut hans í tryggingafélaginu. Kaupandi er Milestone ehf., sem er í eigu Karls Wernerssonar og fjölskyldu. Milestone ehf. átti fyrir 66,6% í Sjóvá. Eftir kaupin er Sjóvá því alfarið í eigu Milestone ehf. Söluverðið er 9,5 milljarðar sem endurspeglar 28,5 milljarða króna virði alls hlutafjár Sjóvá-Almennra trygginga. Með sölunni innleysir bankinn á yfirstandandi ársfjórðungi rúmlega 2,4 milljarða króna í söluhagnað. Kaupverðið er greitt með peningum og fer frágangur viðskiptanna fram þann 19. maí næstkomandi, að því er segir í fréttatilkynningu.

Samhliða þessum viðskiptum kaupir Glitnir banki hlut Milestone í fjárfestingarfélaginu Mætti hf. og eiga Sjóvá og Glitnir Mátt til helminga eftir viðskiptin. Eigendur Máttar stefna að því að fá aðra fjárfesta til liðs við félagið.

Glitnir og Sjóvá munu áfram starfa náið saman á sviði banka- og tryggingaþjónustu og verður samstarfið eflt m.a. í útibúum víða um land. Þá munu félögin auka samvinnu meðal annars með auknu sameiginlegu vöruframboði.