Ísland er í fjórða sæti hvað varðar samkeppnishæfi þjóða í nýrri alþjóðlegri könnun, sem IMD-viðskiptaháskólinn í Sviss hefur gert, og er Ísland efst Evrópuríkja. Í fyrra var Ísland einnig í fjórða sæti könnunarinnar, sem Viðskiptaráð Íslands og Glitnir kynntu á blaðamannafundi.

Að sögn Halldórs Benjamíns Þorbergssonar, hagfræðings Viðskiptaráðs, sækir Ísland fast að Singapúr sem er í þriðja sæti. Bandaríkin eru efst í könnuninni líkt og á síðasta ári, Hong Kong er í öðru sæti og Singapúr í því þriðja, en engin breyting er á röð fjögurra efstu landa í könnun IMD.

Litið er til fjögurra þátta í könnuninni:

• Skilvirkni hins opinbera og hækkar Ísland um tvö sæti þar, úr því sjötta árið 2005 í fjórða sæti árið 2006.

• Gangur íslensks hagkerfis, en þar tekur Ísland stórt stökk upp á við, enda hafa verið miklir uppgangstímar hér á landi að sögn Halldórs. Ísland er hér í sjötta sæti en var í því 17. í fyrra.

• Skilvirkni viðskiptalífsins er mikil á Íslandi og er Ísland með næst skilvirkasta viðskiptaumhverfið í alþjóðlegum samanburði. Var Ísland einnig í öðru sæti á síðasta ári, að sögn Halldórs.

• Innviðir hagkerfisins. Þar er Ísland í 11. sæti en færist upp um eitt sæti frá fyrra ári. Að sögn Halldórs hefur Ísland verið á svipuðu róli síðustu fimm ár hvað varðar innviði hagkerfisins. Hér er litið til atriða eins og menntunar, umhverfismála, tæknimála og heilsufars svo eitthvað sé nefnt. Helstu veikleikar Íslands eru að útflutningur á hátækni er lítill og heildarfjöldi tölva.

Halldór segir að framtíðarsýn Viðskiptaráðs sé, að hér verði áfram ráðdeild í ríkisrekstri. Skattar verði lækkaðir á fyrirtæki og einstaklinga. Dregið verði úr ríkisafskiptum, dregið úr hömlum á erlenda fjárfestingu og Ísland kynnt fyrir erlendum aðilum.

Mikilvægt innlegg
Ingólfur Bender, forstöðumaður greiningardeildar Glitnis, segir að könnunin sé verðmætt innlegg í þá umræðu sem nú er um Ísland og íslenskt efnahagslíf.

Niðurstaðan í þessari greiningu, líkt og undanfarin ár, sé að Ísland stendur sig vel. Þeir neikvæðu þættir séu í mörgum tilvikum þættir, sem ekki er hægt að gera neitt í, til að mynda fjölgun landsmanna. Segir Ingólfur mikilvægt að hafa skýrslu sem þessa, sem sýni fram á að munur er á Íslandi og ýmsum þeim löndum, sem Ísland hafi verið borið saman við í einhverjum þeim skýrslum sem erlendar greiningardeildir hafa gefið út um íslenskt efnahagslíf að undanförnu. Að hans sögn geta Íslendingar aukið framleiðni og lært mikið af þeim löndum sem eru í þremur efstu sætunum.

Á blaðamannafundinum var spurt um hvort innganga í Evrópusambandið hefði einhver áhrif á stöðu landsins á listanum. Halldór sagði að Ísland væri efst Evrópuþjóða á listanum og það segði allt sem segja þyrfti.

Könnunin hefur verið gerð frá árinu 1989 og eru niðurstöður hennar birtar árlega. Samkeppnishæfi ríflega 60 landa er metið í könnuninni út frá ríflega 300 hagvísum og svörum frá framámönnum í viðskiptalífinu.

Listinn yfir samkeppnishæfustu hagkerfin er þessi:

1. Bandaríkin
2. Hong Kong
3. Singapúr
4. Ísland
5. Danmörk
6. Ástralía
7. Kanada
8. Sviss
9. Lúxemborg
10. Finnland
11. Írland
12. Noregur
13. Austurríki
14. Svíþjóð
15. Holland
16. Bæjaraland (í Þýskalandi)
17. Japan
18. Taívan
19. Kína
20. Eistland