Á fundinum var einnig samþykkt að veita stjórn Actavis heimild til þess að skuldbinda félagið samkvæmt lánasamningi og gefa út breytirétt í hlutafé félagsins vegna skuldbindingarinnar sem gæti numið allt að 525 milljónum evra, jafngildi 48,6 milljarða íslenskra króna, í hlutafé.

Báðar heimildirnar, sem samtals hljóða upp á hátt í 70 milljarða króna, eru veittar til að veita stjórn félagsins sveigjanleika við fjármögnun vegna hugsanlegra kaupa eða yfirtöku á Pliva en reikna má með að heildarfjármögnun vegna kaupa á Pliva, ef af þeim yrði, gæti numið hátt í 200 milljörðum króna eða þar um bil.

Actavis á fyrir um 21% hlut í Pliva með kaupréttarsamningum.

Actavis og bandaríska fyrirtækið Barr Pharmaceuticals hafa slegist um Pliva og virðist liggja fyrir miðað við samþykktir hluthafafundarins að Actavis hafi enn fullan hug á að kaupa Pliva.

Actavis sendi út viljayfirlýsingu í lok júní um að það hygðist gera formlegt yfirtökutilboð í Pliva. Sú viljayfirlýsing af hálfu Actavis mun enn standa.

Í tilkynningu Actavis til Kauphallar Íslands segir að handhafar umrædds láns fengju heimild til þess að breyta kröfum sínum á hendur Actavis í hlutabréf í A-flokki á breytiréttartímabili sem er skilgreint frá fjórum árum frá gildistöku lánsins fram að sex árum frá gildistöku þess. Fram kemur í tilkynningu Actavis til Kauphallar Íslands að vaxtakjör lánsins séu allt að 15% ofan á millibankavexti. Breytiréttarverð skal miðast við hið lægra af annaðhvort 120% af viðskiptaverði á gildistöku lánsins eða viðskiptaverði á breytiréttardegi.