Þórður Már spáir yfirtöku eða að erlendur banki eigi eftir að gerast kjölfestufjárfestir á Íslandi
Þórður Már Jóhannesson
Þórðar Már segir að gríðarleg framþróun hafi átt sér stað á Íslandi og nú sé fjármálamarkaðurinn orðinn undirstöðuatvinnugrein þjóðarinnar ásamt sjávarútveginum.
Þórður segir að fjármagnsmarkaðurinn sé gríðarlega öflugur á Íslandi og skipti miklu í þeirri þróun sem átt hefur sér stað hér.
Að sögn Þórðar er eigið fé íslensku bankanna að nálgast 600 milljarða króna. Hann segist telja að bankarnir muni stækka enn frekar erlendis með kaupum á fjármálafyrirtækjum og einhverjir bankana muni einungis stækka erlendis en ekki á Íslandi.
Skilyrði til að fjármagna yfirtökur hafa verið hagstæð á undanförnum árum að sögn Þórðar og yfirtökur hafa bætt tekjudreifingu og dregið úr áhættu bankanna. Þórður segir að Ísland sé komið á kortið á alþjóðlegum fjármálamarkaði og vel sé fylgst með öllu hér.
Hann segist telja að erlend samkeppni muni aukast á næstu árum en engir erlendir bankar eru starfandi á Íslandi. Skýrist það af litlu hagkerfi, lítilli þekkingu á íslensku efnahagslífi sem þó fer vaxandi. Eins skipti mikil samkeppni innlendra banka þar máli. Ein leiðin fyrir erlenda banka til að koma inn á íslenskan bankamarkað er að gerast kjölfestufjárfestir til að mynda ef íslenskir kjölfestufjárfestar vilja losa um eignarhlut sinn. Hann segist ekki sjá fyrir sér frekari sameiningu viðskiptabankanna á Íslandi heldur verði frekar um yfirtökur að ræða á smærri fjármálastofnunum. Segir Þórður að fjármögnun bankanna sé mikilvægur þáttur um val á höfuðstöðvum. Mikil ábyrgð sé á herðum stjórnvalda að tryggja þeim gott starfsumhverfi.
