Actavis hefur hækkað tilboð sitt í króatíska lyfjafyrirtækið Pliva, í 795 kúnur á hlut og fengið staðfestingu fjármálaeftirlits Króatíu á því. Tilboðið er 10,0% hærra en fyrra tilboð Actavis, sem var 723 kúnur á hlut og jafngildir tilboð félagsins 2,5 milljörðum bandaríkjadala eða um 175 milljörðum króna. Tilboðið er jafnframt 7,0% hærra en það tilboð sem bandaríska lyfjafyrirtækið Barr Pharmaceuticals Inc. hefur gert í Pliva, en það er hljóðar upp á 743 kúnur á hlut. Sá eignarhlutur sem Actavis stýrir með beinum eða óbeinum hætti nemur nú 20,8% af útistandandi hlutafé Pliva.

Samkvæmt skilmálum tilboðsins fá hluthafar í Pliva 795 kúnur á hvern hlut, til viðbótar við arðgreiðslu sem nemur 12 kúnum á hlut, í reiðufé og verða kaupin fjármögnuð með nýju hlutafé og lánum. Fjármögnun tilboðsins er að fullu lokið og að baki henni standa alþjóðlegu viðskiptabankarnir JP Morgan, HSBC og UBS, auk íslensku bankanna Glitnis og Landsbanka Íslands. Í tengslum við kaupin, hefur stjórn félagsins fengið samþykki hluthafa fyrir útgáfu nýs hlutafjár sem nemur allt að 300 milljónum hluta, að því er segir í tilkynningu til Kauphallar Íslands.

„Með kaupunum verður til þriðja stærsta samheitalyfjafyrirtæki heims og telur Actavis að umtalsverð samlegðartækifæri liggi í kaupunum fyrir hluthafa Actavis og að tilboðið sé einnig afar áhugavert fyrir hluthafa Pliva.

Actavis stefnir að því að gera höfuðstöðvar Pliva í Króatíu að höfuðstöðvum samstæðunnar fyrir Mið- og Austur Evrópu.

Actavis mun leita leiða til að samþætta framleiðslustarfsemi sína á heimsvísu og flytja framleiðslu til Króatíu og þannig nýta það hagstæða rekstrarumhverfi sem þar er.

Lögð verður áhersla á að viðhalda öflugu vörumerki Pliva á helstu mörkuðum félagsins og Actavis hefur ekki í hyggju að selja frá sér einstaka einingar Pliva.

Þá hyggst Actavis fjárfesta enn frekar í þróunarstarfsemi og verksmiðjum Pliva og telur áhugaverð tækifæri felast í samrunanum fyrir stjórnendur og starfsfólk beggja félaga.

Actavis stefnir að því að sækja um skráningu á hlutabréfamarkað í Zagreb og þannig gefa fjárfestum í Króatíu tækifæri til að fjárfesta í sameinuðu félagi," að því er segir í tilkynningu frá Actavis.

Actavis telur að umtalsverð tækifæri séu fólgin í samlegðaráhrifum í tengslum við yfirtökuna, sem búist er við að geti numið um 50 milljónum evra á árinu 2007, 100 milljónum evra á árinu 2008 og sömu upphæð ár hvert eftir það. Gert er ráð fyrir að kaupin hafi óveruleg áhrif á hagnað á hlut (án tillits til afskriftar viðskiptavildar) á árinu 2007, jákvæð áhrif á árinu 2008 og mjög jákvæð áhrif á árinu 2009 og næstu ár þar á eftir. Þá er búist við að EBITDA hlutfall félagsins aukist úr 21-22% (núverandi afkomuspá fyrir 2007) í 23% á árinu 2007.

Króatíska fjármálaeftirlitið (HANFA) hefur samþykkt tilboð Actavis og verður formlegt tilboð birt í króatíska lögbirtingarblaðinu og helstu prentmiðlum þar í landi á næstu dögum. Í kjölfarið hefst formlegt tilboðsferli, sem mun taka minnst 30 daga en hægt er að fá framlengingu um 30 viðbótardaga ef tilboðsaðilar kjósa að hækka tilboð sitt við lok fyrstu 30 daganna. Actavis væntir þess að tilboðið verði opnað fyrir hluthafa Pliva í byrjun næstu viku og er tilboðið skilyrt við að félagið kaupi yfir 50% af útistandandi hlutafé félagsins, samkvæmt tilkynningu frá Actavis.