Stjórn Actavis hefur ákveðið að hækka ekki tilboð sitt til hluthafa PLIVA að svo stöddu. Fram kemur í fréttatilkynningu frá fyrirtækinu að ákvörðunin sé tekin í kjölfar tilkynningar Barr Pharmaceuticals um að það hækki tilboð sitt og að stjórn Actavis telji að núverandi tilboð þess að upphæð 2,5 milljarða Bandaríkjadala endurspegli vel virði félagsins.

Þá segir að í samræmi við framangreint muni Actavis hafa samband við fjármálaeftirlit Króatíu í því skyni að losa þá ábyrgð sem félagið hefur lagt fram vegna tilboðs síns í hlutafé PLIVA. „Bein og óbein eignaraðild Actavis nemur 20,8% af heildarhlutafé í PLIVA og mun félagið fylgjast með framvindu söluferlisins og áskilur sér rétt til að ganga aftur inn í það ferli," segir m.a. í tilkynningunni. Þar er einnig haft eftir Róbert Wessman, forstjóra Actavis að hann telji vaxtartækifæri félagsins liggja víða og að forsvarsmenn þess muni halda áfram að efla góða undirliggjandi starfsemi félagsins.