Þýska flugfélagið Lufthansa tilkynnti í dag að hafin yrði endurnýjun á langflugsflota félagsins og hefðu í því skyni verið pantaðar 20 nýjar Boeing 747-8 og sjö Airbus A340. Fyrstu Boeingvélarnar verði afhentar 2010, en Airbusvélarnar 2008 og 2009. Lufthansa er fyrsta flugfélagið sem pantar farþegaútgáfu af Boeing 747-8, en 44 fraktvélar af þessari gerð hafa verið pantaðar.

Þróun þessarar nýju útgáfu af 747 hófst fyrir ári, en hún er tæplega sex metrum lengri en 747-400 og á henni verða samskonar GE-hreyflar og eiga að knýja 787 Dreamliner-vélina. 747-8 á að bera 467 farþega, en eldri gerðir taka mest 416. Væntanleg risaþota Airbus, A380, á að taka 550 farþega.