Hagnaður japanska bílaframleiðandans Toyota Motor Corp jókst um 7,3% á þriðja fjórðungi rekstarárs fyrirtækisins miðað við sama ársfjórðung árið á undan og hefur aldrei verið meiri. Segir fyrirtækið þetta aðallega að þakka mikilli bílasölu í Norður-Ameríku og Evrópu en salan á heimamarkaði hefur ekki verið eins góð.

Hagnaður Toyota nam 242 milljarða íslenskra króna. Tekjur jukust um 15,2% frá samsvarandi ársfjórðungi árið áður og námu 6,15 billjónum jena, sem einnig er met.

Toyota breytti ekki áætlun fyrir rekstarárið í heild og segist enn reikna með 1,55 billjóna jena hagnaði á árinu öllu og tekjur verði 23,2 billjónir jena.

Þá segist fyrirtækið standa við spá um að það framleiði 8,47 milljónir bíla á rekstarárinu og 9,42 milljónir bíla á árinu 2007. Samkvæmt því mun Toyota verða stærsti bílaframleiðandi heims á árinu og fara fram úr General Motors.