Hagnaður ÍAV 532 milljónir
Nýlega hafa ÍAV gengið frá verksamningum um byggingu 2. áfanga Skuggahverfis
Afskriftir ársins námu 274 milljónir króna. Hagnaður fyrir fjármagnsliði og skatta nam 889 milljónum króna á árinu. Hagnaður félagsins fyrir skatta, að teknu tilliti til fjármagnsliða nam 657 milljónum króna, en fjármagnsliðir voru nettó neikvæðir um 232 milljónir króna.
Heildareignir Íslenskra aðalverktaka hf. og dótturfélaga námu 8.645 milljónum króna í lok desember 2006. Heildarskuldir samstæðunnar voru 6.004 milljónir króna og bókfært eigið fé þann 31. desember 2006 var 2.640 milljónir króna. Eiginfjárhlutfall var því 31%.
Veltufé samstæðu Íslenskra aðalverktaka hf. frá rekstri á árinu 2006 var 908 milljónir króna.
Handbært fé í lok desember 2006 var 322 milljónir króna og veltufjárhlutfall var 2,01.
Nokkur samdráttur var í íbúðarbyggingum félagsins á árinu 2006, en sala íbúðarhúsnæðis gekk áfram vel. Tekjur félagsins jukust um 27% á milli ára og gert er ráð fyrir áframhaldandi vexti á starfsemi félagsins, samkvæmt tilkynningu til Kauphallar Íslands. Stærsta einstaka verkefni félagsins um þessar mundir er bygging Tónlistar- og ráðstefnuhúss við Reykjavíkurhöfn. Auk þess er unnið að stækkun Lagafossvirkjunar, skrifstofubyggingu við Borgartún 26, bygging 14 hæða nýbyggingar við Grandhótel, byggingu Háskólatorgs við Háskóla Íslands auk fjölda íbúðarbygginga og annarra verkefna.
Nýlega hefur félagið gengið frá verksamningum um byggingu 2. áfanga Skuggahverfis fyrir 101 Skuggahverfi ehf. ásamt því að semja við Eignarhaldsfélagið Mörkin ehf. / Nýsi hf. um fullnaðarfrágang tæplega 80 íbúða fjölbýlishúss við Suðurlandsbraut 58-62.
Hjá Íslenskum aðalverktökum hf. og dótturfélögum þess störfuðu að meðaltali 554 starfsmenn á árinu 2006 auk starfsmanna undirverktaka sem skipta hundruðum.
