Fyrstu tvo mánuðina 2007 voru fluttar út vörur fyrir 43,2 milljarða króna en inn fyrir 54,4 milljarða króna fob (59,0 milljarða króna cif). Halli var á vöruskiptunum við útlönd, reiknað á fob verðmæti, sem nam 11,2 milljörðum en á sama tíma árið áður voru þau óhagstæð um 18,7 milljarða á sama gengi. Vöruskiptajöfnuðurinn var því 7,5 milljörðum króna skárri en á sama tíma árið áður.

Í frétt Hagstofu Íslands kemur fram að í febrúarmánuði voru fluttar út vörur fyrir 23,9 milljarða króna og inn fyrir 29,0 milljarða króna fob (31,4 milljarða króna cif). Vöruskiptin í febrúar, reiknuð á fob verðmæti, voru því óhagstæð um 5,0 milljarð króna. Í febrúar 2006 voru vöruskiptin óhagstæð um 8,8 milljarða króna á sama gengi.

Iðnaðarvörur 47% alls útflutnings

Fyrstu tvo mánuðina ársins 2007 nam verðmæti vöruútflutnings 6,6 milljörðum eða 17,9% meira á föstu gengi en á sama tíma árið áður. Sjávarafurðir voru 47% alls útflutnings og var verðmæti þeirra 4,5% meira en á sama tíma árið áður. Útfluttar iðnaðarvörur voru 47% alls útflutnings og var verðmæti þeirra 66,9% meira en árið áður.

Samdráttur í innflutningi á bifreiðum

Fyrstu tvo mánuði ársins 2007 nam verðmæti vöruinnflutnings 0,9 milljörðum eða 1,7% minna á föstu gengi en árið áður. Mestur varð samdráttur í innflutningi á fólksbílum og flugvélum en á móti kom aukning í innflutningi á fjárfestingarvöru.