Skráð atvinnuleysi í mars 2007 var 1,3%, en það jafngildir því að 1934 manns hafi verið án atvinnu að jafnaði. Eru það 103 færri en í febrúar. Atvinnuleysi í mars var minna en á sama tíma fyrir ári þegar það var 1,5%. Vinnumálastofnun gerir ráð fyrir því, að enn dragi úr atvinnuleysi í apríl og það verði á bilinu 1,1% til 1,4%.

Atvinnuleysi minnkaði á höfuðborgarsvæðinu um 2,8% milli mánaða og nokkru meira á landsbyggðinni eða um 7,5%. Atvinnuleysi kvenna mældist 1,6% og karla 1%. Atvinnuleysi karla minnkaði um 5% og tæplega 4,8% meðal kvenna.

Meðal karla kemur fækkunin fyrst og fremst fram á landsbyggðinni en fækkunin skiptist svipað milli landsbyggðar og höfuðborgar meðal kvenna. Um 19% atvinnulausra í mars var ungt fólk á aldrinum 16-24 ára eða litlu minna en í febrúar sl.. Fjöldi þeirra sem hafa verið á skrá í innan við 3 mánuði minnkaði lítilsháttar í mars en talsverð hreyfing hefur verið á atvinnuleysisskrá undanfarið. Þeim sem verið hafa á skrá lengur en 6 mánuði fjölgar hins vegar úr 599 í 655.

Aðeins voru gefin út 82 ný atvinnuleyfi í mars til íbúa utan hins Evrópska efnahagssvæðis. Nýskráningar ríkisborgara frá nýju ríkjum ESB voru 411, eða samtals 493. Til samanburðar voru gefin út 550 ný atvinnuleyfi í mars 2006, þegar íbúar nýju ríkjanna þurftu atvinnuleyfi til að koma hingað til starfa og því um nokkra fækkun að ræða milli ára. Vísbendingar um atvinnuástandið í apríl.