Kanadíska álfélagið Alcan, móðurfélag Alcan á Íslandi sem rekur álverið í Straumsvík, hyggur á miklar fjárfestingar í Sádi-Arabíu. Alcan tilkynnti í vikunni að það muni í samstarfi við sádi-arabíska námufélagið Ma'aden, reisa eitt stærsta álver heims og er fjárfestingin áætluð um 7 milljarðar dala, jafnvirði 450 milljarða króna.

Að sögn Reutersfréttastofunnar mun Alcan eiga 49% hlut í fyrirtæki sem mun reisa um 720 þúsund tonna álver, 1,6 milljóna tonna hreinsistöð og 1400 megavatta raforkuver.

Miklar báxítnámur eru í norðurhluta Sádi-Arabíu og er gert ráð fyrir að þær nægi til að framleiða súrál í að minnsta kosti 30 ár.

Ma'aden er í eigu ríkisstjórnar Sádi-Arabíu. Fyrirtækið rekur einkum gullnámur en áformar að afla 2,5 milljarða dala á þessu ári með hlutabréfaútboði, sem gæti leitt til þess að 40% af hlutafé þess komist í hendur einkaaðila.