Davíð: Verðbólga hefur hjaðnað en hægar en spár gerðu ráð fyrir

Davíð Oddsson, formaður bankastjórnar Seðlabankans, segir að verðbólga hafi hjaðnað á árinu en hægar en gert var ráð fyrir í spám bankans. Þá sé undirliggjandi verðbólga enn langt yfir markmiðum bankans. Davíð gerði í dag grein fyrir ástæðum þess, að bankastjórnin ákvað að halda stýrivöxtum óbreyttum, 14,25%.

Davíð sagði aðspurður á blaðamannafundi, að Seðlabankinn héldi sínu striki, óháð því hvaða stjórn væri í landinu, en vonaðist til þess að ákvarðanir stjórnvalda væru í samræmi við markmið Seðlabankans, að tryggja að stöðugleika í efnahagslífi væri ekki ógnað.

Þegar Davíð var spurður hvenær búast mætti við því að vextir færu að lækka að nýju vísaði hann til yfirlýsingar bankastjórnarinnar frá í mars þar sem sagði að skilyrði kynnu að hafa skapast til þess undir lok ársins. Sagði hann að sú yfirlýsing gæti þó gengið í báðar áttir og bankinn muni bregðast við því ef skilyrði breyttust.

Í yfirlýsingu bankastjórnarinnar segir, að verðbólguhorfur til næstu ára séu taldar áþekkar og í mars. Raunstýrivextir séu háir og þess sjái stað í ávöxtun bæði óverðtryggðra og verðtryggðra skuldabréfa. Áhrif hærri ávöxtunarkröfu skuldabréfa gætu enn átt eftir að koma fram að fullu í útlánsvöxtum lánastofnana.

Þá kemur fram, að framvinda efnahagsvísbendinga það sem af er ári virðist í aðalatriðum í samræmi við þjóðhagsspá Seðlabankans, sem gefin var út í marslok. Vöruútflutningur hafi þó sennilega verið meiri en spáð var. Hraður atvinnuvöxtur bendi til þess að umsvif í efnahagslífinu verði a.m.k. ekki minni næstu mánuði en fólst í spánni.

Bankinn segir, að hagstæð skilyrði á alþjóðlegum fjármálamörkuðum, háir innlendir vextir og bjartsýni í efnahagslífinu hafi stuðlað að háu gengi krónunnar. Mikill viðskiptahalli og tiltölulega hátt raungengi feli sem fyrr í sér verulega hættu á lækkun gengisins, t.d. ef alþjóðleg fjármálaskilyrði verða óhagstæðari. Verðbólguhorfur gætu þá versnað, einkum ef gengið lækkar áður en dregur úr spennu á vinnumarkaði sem engin teikn eru um enn. Þá gætu verðlagsáhrif launahækkana undanfarið ár langt umfram framleiðnivöxt enn átt eftir að koma fram að fullu.

Heimasíða Seðlabankans

• 2 blogg um fréttina

Bloggað um fréttina

• Sigfús Þ. Sigmundsson: Verðbólga að hjaðna
• Ívar Pálsson: Vextir lækka ekki