Óróleikinn á alþjóðlegum fjármálamörkuðum hefur ekki enn haft mikil áhrif hér á landi þótt gengi krónunnar hafi veikst. Nú þegar krónan er komin í námunda við jafnvægisgildi skapast tækifæri til þess að brjótast út úr vítahring gengisóstöðugleika og hárra vaxta. Þetta tækifæri á Seðlabankinn að nýta. Þetta kemur fram í nýrri Hagspá Landsbanka Íslands sem kynnt var á fjölmennum morgunverðarfundi í morgun.

Kemur fram í skýrslunni að aukin áhættufælni á fjármálamörkuðum dragi úr áhuga erlendra fjárfesta á vaxtamunaviðskiptum með íslensku krónuna. Það leiði til snöggrar veikingar krónunnar eins og raunin varð seinni hluta júlí og fram eftir ágústmánuði þegar krónan veiktist um rúm 12% á rúmum þremur vikum.

29% hlutafjárfestinga fjármagnaðar með lánsfé

„Í kjölfar þess lækkuðu íslensk hlutabréf í verði, þrátt fyrir að undirliggjandi rekstur fyrirtækjanna stæði vel og verðmæti íslenskra fyrirtækja með stóran hluta tekna sinna í erlendri mynt ætti í rauninni að hækka við veikingu krónunnar. Lækkunin átti sér hins vegar stað vegna stöðutöku íslenskra fyrirtækja erlendis, sem fjármagnað höfðu hlutafjárkaup sín með erlendum lánum, þurftu að losa stöður sínar. Seðlabankinn hefur áætlað að 29% hlutafjárfestinga um síðustu áramót hafi verið fjármagnaðar með lánsfé," samkvæmt skýrslu Landsbankans.

Samkvæmt Hagspá Greiningardeildar Landsbankans ýtir varanleg veiking krónunnar undir verðbólguþrýsting að öðru óbreyttu. „Seðlabankinn hefur hins vegar ítrekað lýst því yfir að hann muni bregðast við slíkri þróun með vaxtahækkun - sem gæti þá haldið enn við gengi íslensku krónunnar. Hér munu því enn um sinn takast á kraftar áhættufælni og hás vaxtamunar við útlönd. Áhrifin á íslenskan skuldabréfamarkað hafa verið takmörkuð þar sem fjárfestar hafa aðallega fært fjármuni úr áhættumeiri eignum á peningamarkað í stað skuldabréfamarkaðs eins og víða erlendis. Veiking krónunnar leiðir hins vegar til aukinnar eftirspurnar eftir verðtryggðum bréfum, sérstaklega styttri flokkunum, vegna væntinga um aukna verðbólgu," samkvæmt skýrslu Landsbankans.

Sigurjón Þ. Árnason, bankastjóri Landsbankans, minntist á fundinum á stöðu breska bankans Northern Rock. Þar stæðu menn í biðröðum til þess að taka sparifé sitt út en hér á Íslandi hafi íslensku bankarnir undirbúið sig vel eftir að hafa lent í lítilsháttar erfiðleikum.

Samkvæmt Hagspá Landsbankans 2008-2010 er útlit fyrir að hagvöxtur verði 1,8% í ár, 3,7% á næsta ári og 4% árið 2009. „Við spáum mjúkri lendingu og áframhaldandi hagvexti, drifnum af fjárfestingum og ört vaxandi fólksfjölda. Fjárfesting í stóriðju, íbúðabyggingum og hjá hinu opinbera verður áfram mikil. Nokkur bið er á að aukin framleiðslugeta vinni á viðskiptahallanum," samkvæmt spá Landsbankans.