Viðskipti | mbl | 20.11.2007 | 17:46

Undirstaða íslenska hagkerfisins enn traust

Undirstaða íslenska hagkerfisins er enn traust, segir Kaupþing.

Tíðindi sem þessi séu því líklegri en ella til að hafa skörp skammtímaáhrif eins og raunin var í dag en þegar fjárfestar átti sig á vægi fréttanna leiðréttist markaðir fljótt í kjölfarið enda megi segja að fjölmörg kauptækifæri hafi myndast á markaði í dag.

„Undirstöðuatriði í íslensku hagkerfi eru enn traust en eins og S&P bendir á þá hefur staða opinberra fjármála aldrei verið betri en einmitt nú. Ef kreppa er handan við hornið er að mati Greiningardeildar (Kaupþings) líklegt að ríkið grípi inn í slíka atburðarrás með tilkynningum um stórframkvæmdir til að hjálpa hagkerfinu. Enn frekar er ekki ólíklegt að tilkynnt verði um stórframkvæmd í Helguvík á næstunni. Að mati Greiningardeildar verður eilítill samdráttur í hagvexti á næsta ári en að hann komist aftur á strik árið 2009," segir m.a. í ½5 fréttum Kaupþings.

Greiningardeild Landsbankans fjallar einnig um tilkynningi S&P í Vegvísi sínum síðdegis og segir, að þrátt tt fyrir óbreytta lánshæfiseinkunn geti breyting á horfum í neikvæðar haft áhrif á kjör í lánsfjárútboðum. Meti markaðsaðilar það svo, að breytingin verði til þess að stjórnvöld taki á þeim þáttum sem helst ógni lánshæfismatinu verði áhrifin engin. Telji markaðsaðilar líkur á að ekki verði brugðist við og lánshæfiseinkunnin muni lækka í framhaldinu geti það haft í för með sér verri kjör í næstu útboðum.

„Þar sem lánsfjárþörf ríkisins á erlendum mörkuðum er lítil er líklegt að áhrifin verði fyrst og fremst á Íbúðalánasjóð á næstunni auk Landsvirkjunar. Líkur á frekari vaxtahækkunum í kjölfar næstu skuldabréfaútboða hafa því enn aukist. Vextir á skuldabréfum Íbúðalánasjóðs leggja grunninn að verðlagningu allra verðtryggðra skuldbindinga hér á landi og því hafa breytingar á þeim víðtæk áhrif í hagkerfinu," segir Landsbankinn.