Davíð Oddsson, seðlabankastjóri, segir að álit Seðlabankans um heimild til handa Kaupþingi að gera upp í evrum hafi ekki haft nein áhrif á ákvörðun ársreikningaskrár um að hafna Kaupþingi um að gera upp í evrum. Segir Davíð fráleitt að ásaka Seðlabankann um að hafa haft áhrif þar á. Þetta kom fram á fundi með fjölmiðlum vegna ákvörðunar Seðlabanka Íslands að halda stýrivöxtum óbreyttum.

Að sögn Davíðs fór ársreikningaskrá yfir þær tölur sem fyrir lágu og taldi ekki að Kaupþing uppfyllti þau skilyrði laga sem gilda. Segist Davíð telja það slæmt að ákvörðun ársreikningaskrá var ekki birt þar sem ákveðins misskilnings virðist gæta um hlut Seðlabankans í málinu.

Málið hafi einfaldlega verið það að ársreikningaskrá taldi að ákvörðun um hvort að yfirtakan á hollenska bankanum NIBC yrði að veruleika fyrir áramót væri skilyrði fyrir því að Kaupþing fengi heimildina til að gera upp í evrum. Sú ákvörðun hafi hins vegar ekki legið fyrir á þeim tíma.

Kaupþing kærði í byrjun janúar til fjármálaráðuneytisins ákvörðun ársreikningaskrár varðandi umsókn bankans um að fá að gera upp reikninga sína í evrum. Jónas Sigurgeirsson, framkvæmdastjóri samskiptasviðs Kaupþings, sagði í samtali við Morgunblaðið þann 9. janúar sl. ársreikningaskrá hafa gefið leyfi til að gera upp í evrum, en hafi sett það skilyrði að breytingunni yrði frestað um ár, eða til ársbyrjunar 2009.

Það sé bankinn ósáttur við, enda hafi áætlanir gert ráð fyrir að breytingin yrði nú. Málið sé nú í höndum ráðherra, sem hafi endanlegt úrskurðarvald í málinu, en þar til ákvörðun hans liggi fyrir líti bankinn svo á að málið sé í farvegi.

Stjórn Kaupþings tilkynnti í haust að bankinn hygðist taka upp evru um nýliðin áramót. Kaupþing myndi þá færa bókhald og skila ársreikningum í evrum.