Eftir Agnesi Bragadóttur agnes@mbl.is

Fons, eignarhaldsfélag í eigu þeirra Pálma Haraldssonar og Jóhannesar Kristinssonar, hagnaðist um 4,7 milljarða króna, eftir skatta á liðnu ári, að sögn Pálma Haraldssonar.

Hann kveðst í samtali við Morgunblaðið hafa ákveðið að upplýsa um afkomu sl. árs, í kjölfar fréttaflutnings 24ra stunda í liðinni viku.

„Það var reynt með ómaklegum hætti að ráðast á mig og mitt félag, og þessar upplýsingar eru svar Fons við þeirri árás,“ segir Pálmi.

„Nettóhagnaður okkar á liðnu ári var rúmir 4,7 milljarðar króna, þ.e. hagnaður eftir skatta, en fyrir skatta var hagnaðurinn rúmir sjö milljarðar króna,“ sagði Pálmi. Hann kveðst telja þessa útkomu félagsins á liðnu ári ágætlega viðunandi, einkum þegar horft sé til þess hversu erfiður seinni hluti ársins 2007 reyndist mörgum. „Við hjá Fons urðum fyrir skakkaföllum eins og aðrir og fórum sannarlega ekki varhluta af þeim, en unum sáttir við þessa útkomu,“ sagði Pálmi.

Pálmi upplýsir jafnframt að eigið fé Fons í árslok 2007 hafi numið rúmum 40 milljörðum króna og eiginfjárhlutfallið hafi verið um 40%. Heildareignir félagsins hafi þannig numið um 100 milljörðum króna um síðustu áramót.

Aðspurður hvort Fons muni hafa þann háttinn á í framtíðinni að upplýsa um árlega afkomu félagsins sagði Pálmi: „Við munum að sjálfsögðu fara að lögum og senda inn ársreikninga. Það að okkur láðist að skila inn ársreikningum var ekkert annað en mistök af okkar hálfu. Við bara gerðum mistök, eins og um 9.700 önnur fyrirtæki í landinu. Hér var ekki um neitt ásetningsbrot að ræða, heldur trassaskap. Að sjálfsögðu munu menn geta fylgst með afkomu félagsins í gegnum Ársreikningaskrá í framtíðinni.“