Þann 10.mars næstkomandi verða forstjóraskipti hjá bifreiðaumboðinu B&L. Erna Gísladóttir sem verið hefur forstjóri hverfur til annarra starfa en Kristinn Þór Geirsson tekur við forstjórastöðunni hjá félaginu.
Kristinn Þór Geirsson hefur undanfarið starfað sem stjórnarformaður B&L jafnhliða stjórnarformennsku í eignarhaldsfélaginu Sævarhöfða, en félagið á og rekur nokkur félög, þar á meðal bifreiðaumboðið Ingvar Helgason.
Erna Gísladóttir, segir í fréttatilkynningu: „Ég kveð fyrirtækið í fullri sátt en jafnframt með söknuði. Við höfum notið mikillar velgengni og vil ég nota þetta tækifæri til að þakka bæði starfsmönnum og öllum viðskiptavinum B&L fyrir samskiptin á liðnum árum. Ég hef fulla trú á fyrirætlunum nýrra eigenda og hlakka til að sjá fyrirtækið vaxa og dafna, þó að ég kjósi að nota þessi tímamót og hverfi til annarra verkefna."