Viðskipti | mbl | 19.3.2008 | 9:59

Krónan heldur áfram að lækka

mbl.is

Gengi krónunnar hélt áfram að lækka við opnun í morgun. Nemur lækkun krónunnar nú 1,22% frá lokun markaða í gær. Gengisvísitalan stendur í 157,40 stigum en fór hæst í 158,30 stig sem er lækkun krónunnar um rúm 2%. Bandaríkjadalur er 77,68 krónur, evra 122,44 krónur og pund 155,58 krónur.

Krónubréf að nafnvirði 25 milljarðar króna á gjalddaga í dag

Í Morgunkorni Glitnis kemur fram að krónubréf að nafnvirði 25 milljarðar króna falla á gjalddaga í dag. Austurríska ríkið gaf út bréfin fyrir ári síðan og var Landsbankinn umsjónaraðili með útgáfunni.

„Gera má ráð fyrir að ólíkt öðrum krónubréfum séu bréfin að mestu í eigu innlendra aðila og hafi því ekki haft teljandi áhrif á gengi krónunnar nú í aðdraganda gjalddagans. Að deginum í dag meðtöldum hafa alls 100 ma. krónubréfa gjaldfallið á árinu að viðbættum vöxtum og nema heildarútistandandi krónubréf nú ríflega 369 mö., eða um 30% af vergri landsframleiðslu. Hefur krónubréfastaðan ekki verið minni frá því í apríl á síðasta ári."

Útgáfa ársins nemur nú ríflega 98 milljörðum króna, en enn hefur engin útgáfa litið dagsins ljós í marsmánuði. „Kemur það ekki á óvart í ljósi þess að vaxtamunur við útlönd hefur minnkað hratt undanfarnar vikur á vaxtaskiptamarkaði og er nú nánast enginn. Hefur væntur ávinningur af krónubréfaútgáfu farið minnkandi af þeim sökum.

Nokkrir smáir krónubréfagjalddagar eru framundan í apríl, en þá gjaldfalla alls krónubréf að fjárhæð 16 ma. auk vaxta. Þá eru 2 ma. krónubréfa á gjalddaga í maí og 15 ma. í júní. Á seinni hluta ársins falla svo krónubréf að nafnvirði 109,5 ma. á gjalddaga.

Ætla má að lítið verði um krónubréfaútgáfur á meðan aðgengi að erlendu lánsfé er takmarkað og áhættufælni fjárfesta á alþjóðamörkuðum mikil líkt og verið hefur að undanförnu. Útgáfan það sem af er ári hefur þó þegar mætt gjalddögum þeim sem verða í apríl og maí þar sem þeir 25 ma. sem gjaldfalla í dag hafa ekki útflæði gjaldeyris í för með sér," að því er fram kemur í Morgunkorni Glitnis.