Óraunhæft er að ætla að Alþjóðagjaldeyrissjóðurinn, IMF, þurfi að koma Íslandi til aðstoðar. Hafa engar umræður átt sér stað í þá veru við sjóðinn.

Þetta segir Sturla Pálsson, framkvæmdastjóri alþjóða- og markaðssviðs Seðlabankans, í samtali við Morgunblaðið, spurður um viðbrögð við frétt breska blaðsins Sunday Telegraph frá í gær, þess efnis að IMF gæti þurft að koma Íslandi til bjargar ef allt færi á versta veg í efnahagsmálum hér á landi.

„Hlutverki sjóðsins er þannig háttað að hann kemur ekki inn nema allt sé farið í kalda kol. Viðkomandi land færi þá inn í sérstaka aðgerðaáætlun á grundvelli strangra skilyrða. Lönd eru komin í verulega vond mál ef þau þurfa að leita til Alþjóða-gjaldeyrissjóðsins. Það er algjörlega óraunhæft að við þurfum að fara þessa leið og gera samninga við sjóðinn. Staða okkar er þröng en fjarri því að efnahagskerfið sé hrunið, sem er nánast forsenda fyrir aðkomu sjóðsins,“ segir Sturla.

IMF hefur skort hlutverk

Hann er ásamt bankastjóra frá Seðlabankanum á leið á árlegan vorfund sjóðsins í Washington í vikunni og hefur ekki orðið var við umræðu eða tillögur um breytt hlutverk IMF vegna lausafjárkreppunnar á alþjóðamörkuðum, eins og gefið er í skyn í frétt Sunday Telegraph.

Sturla segir að vissulega hafi IMF skort ákveðið hlutverk í góðæri síðustu ára á alþjóðamörkuðum. Lítið hafi verið um útlán og eftirspurn lítil eftir lánum til þróunarlanda og nýmarkaðsríkja.

Sturla bendir á að í ljósi aukinna fjármálahreyfinga hafi sjóðurinn á undanförnum árum hins vegar horft í auknum mæli á áhrif fjármálamarkaða á efnahag heimsins í sínu eftirlitshlutverki.

Í frétt breska blaðsins er enn fjallað um nýlega stýrivaxtahækkun Seðlabanka Íslands og hún sögð vera neyðaraðgerð þar sem íslenska hagkerfið sé nú þegar illa statt.

Í hnotskurn

» Ísland á ásamt 184 öðrum ríkjum heims aðild að Alþjóðagjaldeyrissjóðnum.
» Árlegur vorfundur fer fram í vikunni í Washington.
» Í frétt Sunday Telegraph er bent á að IMF hafi síðast gripið inn í árið 1976 þegar breska pundið hrundi tímabundið.