Baugur Group hefur fært helstu skráðu eignir sínar á Íslandi yfir í tvö systurfélög sem kallast Styrkur Invest og Stoðir Invest. Í fréttatilkynningu frá Baugi vegna breytinganna segir að félagið hafi gert samkomulag um sölu á fjárfestingum sínum í fjölmiðlum, tækni og fjármálum og að umfang þessara viðskipta sé um 65 milljarðar króna, eða 430 milljónir punda. Ekki er þó um eiginlega sölu að ræða því helstu eigendur Styrks og Stoða eru þeir sömu og eiga Baug.

Gaumur á öll félögin

Samkvæmt Þórdísi Sigurðardóttur, nýskipuðum forstjóra Stoða Invest, eru eigendur Stoða fjárfestingarfélagið Gaumur og tengdir aðilar, en Gaumur er líka aðaleigandi Baugs. Eigendur Gaums eru Jón Ásgeir Jóhannesson, faðir hans Jóhannes Jónsson og systir hans Kristín Jóhannesdóttir.

Tengdu aðilarnir eru síðan Ingibjörg Pálmadóttir, eiginkona Jóns Ásgeirs, og Hagar sem eru í eigu Baugs. Því eru sömu einstaklingarnir að færa eignir úr einu félagi yfir í annað.

Styrkur Invest hét áður BG Capital og var að fullu í eigu Baugs. Sú breyting verður á að hlutafé Styrks var aukið og Kaldbakur, fjárfestingarfélag Samherja, kemur inn í það sem eigandi 34 prósenta hlutar. Að sögn Eiríks S. Jóhannssonar, forstjóra Styrks, er eina eign félagsins 39,05 prósenta hlutur í FL Group.

Fjármagn og skuldir flytjast

Líkt og áður segir var umfang viðskiptanna sagt vera 65 milljarðar króna. Gunnar Sigurðsson, forstjóri Baugs, segir það í raun vera verðmæti þeirra eigna sem verið sé að færa frá Baugi inn í nýju félögin tvö. Aðspurður hvort fjármagn hafi skipt um hendur segir hann svo vera en að Baugur hafi ekki viljað fara út í það að útskýra þann hluta breytinganna nánar. Hann staðfestir einnig að skuldir hafi færst með hinum færðu eignum inn í Styrk og Stoðir en vildi ekki heldur sundurliða hvers eðlis þær væru. Gunnar segir Baug standa ljómandi vel og að félagið hafi skilað hagnaði á síðasta ári. Hann vill þó ekki gefa upp hver hagnaðurinn var.

Íslensk umsvif dragast saman

Eftir eignatilfærsluna munu umsvif Baugs Group á Íslandi dragast töluvert saman en umsvif eigenda þess félags verða nákvæmlega þau sömu. Fyrir breytinguna voru um 35 prósent af umsvifum Baugs hérlendis en 43 prósent þeirra í Bretlandi þar sem félagið er afar umsvifamikið í smásölufjárfestingum og rekur fjölda matvöru-, tískuvöru-, skartgripa- og sérvöruverslana. Eftir uppskiptinguna munu 70,5 prósent af eignum Baugs vera í Bretlandi en einungis tæp fjórtán prósent á Íslandi.

Óskráð félög sem starfa á íslenskum smásölumarkaði verða þó flest áfram í eigu Baugs. Þau falla flest undir Haga sem reka alls 77 verslanir hér á landi, meðal annars undir merkjum Bónuss (25 verslanir), 10-11 (26 verslanir) og Hagkaupa (10 verslanir). Meðal annarra áberandi verslana í eigu Baugs eru Húsasmiðjan, Blómaval og Útilíf.

Í hnotskurn

Baugur hefur fært fjárfestingar sínar í fjölmiðlum, tækni og fjármálum yfir í tvö systurfélög. Eigendur þeirra eru sömu einstaklingar og eiga í Baugi Group. Heildarumsvif viðskiptanna eru sögð um 65 milljarðar króna.