Íbúðaeigendur sem hafa nýlega fest kaup á íbúðarhúsnæði munu tapa umtalsverðum fjármunum ef spá Seðlabankans um hugsanlega þróun íbúðaverðs og spá hans um verðbólgu gengur eftir. Þá má vænta þess að margir sem hafa tekið u.þ.b. 80% lán til íbúðakaupa verði í stórri skuld í lok ársins 2010, jafnvel þótt þeir hafi getað greitt 20% af kaupverðinu með eigin fé við kaup.

Seðlabankinn gerir ráð fyrir því að húsnæðisverð lækki um u.þ.b. 30% að raunvirði til ársloka 2010. Til að skoða hvað þetta þýðir í raun skal hér tekið dæmi af íbúðakaupanda, sem keypti nýlega íbúð fyrir 25 milljónir króna og tók íbúðalán að fjárhæð 20 milljónir, þ.e. fyrir 80% af kaupverðinu. Ef verðbólguspá Seðlabankans gengur eftir verður verðbólgan á þessu ári um 9,3%, um 5,9% á næsta ári og um 2,8% á árinu 2010.

Flest íbúðalán eru í íslenskum krónum og verðtryggð, svonefnd jafngreiðslulán. Þau eru þannig að á fyrstu árunum eru vextir og verðbætur af þeim langstærsti hlutinn af árlegum greiðslum lántakandans. Afborgunarþátturinn er þá lítill og því greiðist lánið mjög hægt niður fyrstu árin. Verðbætur af höfuðstólnum leggjast við hann og hækkar höfuðstóllinn því með verðbólgunni, eins og flestir lántakendur þekkja vel.