Breska samkeppniseftirlitið boðar hertar reglur

Reglur breska samkeppniseftirlitsins verða hertar varðandi útþenslu og viðskipti breskra matvörukeðja við birgja. Þetta er niðurstaða nýrrar skýrslu eftirlitsins sem kynnt var í dag.

Þrátt fyrir þetta mun samkeppniseftirlitið ekki krefjast þess að  Tesco, stærsta smásölukeðja Bretlands, selji einhverjar verslanir vegna markaðsráðandi stöðu sinnar.

Áætlað er að velta á bresk smásölumarkaðnum nemi 125 milljónum punda árlega. Markaðshlutdeild Tesco er um 32%, Asda er með tæplega 17% markaðshlutdeild, Sainsbury rétt undir 16% og Morrison er með um 11% markaðshlutdeild á breskum smásölumarkaði.

Segir í skýrslu samkeppniseftirlitsins að eðlileg samkeppni ríki á breskum matvörumarkaði en reynt verði að hafa taumhald á því að stórar matvörukeðjur geti lagt undir sig staðbundna markaði með þeim afleiðingum að samkeppni á smærri svæðum minnki og um leið möguleikum neytenda á vali á milli verslana. 

Eigendur lítilla verslana hafa löngum kvartað undan því að stórar keðjur eins og Tesco, J Sainsbury PLC, WM Morrison og Asda, sem er í eigu Wal-Mart, þvingi smærri verslanir og matvælaframleiðendur út af markaðnum þar sem þeir geti ekki keppt við stóru keðjurnar um verð.