Æ fleiri bloggarar handteknir

Sífellt fleiri bloggarar eru handteknir í heiminum fyrir að viðra skoðanir sínar á netinu. Frá árinu 2003 hafa 64 verið handteknir fyrir að birta skoðanir sínar á bloggsíðum, samkvæmt nýrri skýrslu frá University of Washington. Á síðasta ári voru þrefalt fleiri handteknir fyrir blogg um stjórnmál heldur en árið 2006.

Helmingur þeirra sem handteknir hafa verið fyrir blogg eru íbúar í Kína, Egyptalandi og Íran, samkvæmt skýrslunni. Fréttavefur BBC greinir frá þessu.

Helstu ástæður fyrir handtöku bloggara eru blogg um spillingu stjórnvalda, brot á mannréttindum eða fyrir að hvetja til mótmæla samkvæmt skýrslunni. Þar kemur fram að handtökurnar eru vitnisburður um aukin pólitísk áhrif bloggsins. Handtökum bloggara fjölgi þegar óstöðugleiki ríkir í stjórnmálum, til að mynda í kringum kosningar eða víðtæk mótmæli. 

Stór hluti bloggara sem eru handteknir eru dæmdir í fangelsi. Að meðaltali í fimmtán mánaða fangelsi. Harðasti dómurinn er átta ára fangelsi. Hins vegar er talið að mun fleiri bloggarar hafi verið handteknir en tölurnar bendi til þar sem í einhverjum tilvikum er erfitt að fá upplýsingar um handtökur og á hvaða forsendum þær eru. Til að mynda er talið að 344 hafi verið handteknir í Búrma og margir þeirra séu bloggarar, án þess að skýrsluhöfundar hafi fengið það staðfest.