Danski seðlabankinn.

Danski seðlabankinn og hópur minni banka hefur tekið saman höndum um  að bjarga Ebh Bank í Danmörku og gera þannig kleift að selja bankann eða búa í haginn fyrir samruna við annan banka. Þá hefur bankastjóranum verið vikið frá störfum.

Þetta er í annað skipti, sem danski seðlabankinn kemur dönskum banka til aðstoðar á þessu ári en í ágúst tók bankinn yfir Hróarskeldubanka.  

Ebh Bank segir í yfirlýsingu, að hann hafi síðustu vikurnar lent í erfiðleikum vegna lausafjárskorts. Hafi seðlabankinn ásamt hópi minni banka tryggt Ehn Bank nægt lausafé þannig að hann geti haldið áfram starfsemi.

Talið er að um sé að ræða um 200 milljónir danskra króna.

Bankinn hefur lent í vandræðum vegna alþjóðlegu fjármálakreppunnar og vegna þess að hann hefur lánað mikið til fasteignaviðskipta en danskt fasteignaverð hefur lækkað mikið að undanförnu. Ehn Bank er byrjaður að selja dótturfyrirtæki og var settur á athugunarlista í kauphöllinni í Kaupmannahöfn í dag eftir að hann tilkynnti að ekki væri gert ráð fyrir hagnaði á þessu ári.

Danski fjárfestingarbankinn Saxo Bank tilkynnti í dag að verið væri að undirbúa að segja upp um þriðjungi starfsfólks. Alls vinna um 1400 manns hjá bankanum en fækkað verður um 320-340 störf.