Greiðslustöðvun Stoða hf., áður FL Group, var samþykkt í Héraðsdómi Reykjavíkur í gær. Gildir hún til næstu þriggja vikna, eða til 20. október. Á þeim tíma verður gengið til samninga við lánardrottna en samkvæmt upplýsingum Morgunblaðsins er Landsbankinn einn helsti lánardrottinn Stoða, auk fleiri íslenskra og erlendra banka.

Stjórn Stoða sendi í gær frá sér harðorða yfirlýsingu þar sem segir m.a. að óskað hafi verið eftir greiðslustöðvun í kjölfar „þvingaðrar yfirtöku Seðlabankans og ríkisvaldsins“ á Glitni. Ef yfirtakan verði samþykkt á hluthafafundi Glitnis láti nærri að eignarhlutir Stoða í Glitni lækki um 60 milljarða króna. Eigið fé Stoða nam um 87 milljörðum króna við lok annars ársfjórðungs og segir stjórn félagsins að fjárhagsstaða þess sé því í miklu uppnámi.

Greiðslustöðvun Stoða tengist mörgum öðrum félögum sem hafa verið hluti af Baugsveldinu, eins og sést á meðfylgjandi korti. Fyrr á árinu urðu miklar tilfærslur á eignum Baugs í kjölfar endurskipulagningar á FL Group, sem hlaut nafnið Stoðir. Áttu Stoðir að kaupa kjölfestuhlut í Baugi Group, nærri 40%, fyrir 25 milljarða króna, sem átti að greiðast með hlutabréfum í Stoðum. Samþykkja átti þau viðskipti á hluthafafundi sem Stoðir höfðu boðað í dag, en var aflýst í gær eftir að greiðslustöðvunin blasti við.

Auk hluta í Glitni eiga Stoðir hluti í Tryggingamiðstöðinni, fasteignafélaginu Landic Property, drykkjarframleiðandanum Refresco, danska brugghúsinu Royal Unibrew og fasteignafélaginu Bayrock Group.

Stoðir eru að stærstum hluta í eigu Styrks Invest, sem aftur er í eigu Gaums og Kaldbaks, fjárfestingafélags Samherja. Aðrir eigendur Stoða eru Fons, Oddaflug Hannesar Smárasonar og Materia Invest, félag í eigu Þorsteins M. Jónssonar og Magnúsar Ármanns.

Jakob aðstoðarmaður Stoða

Jakob R. Möller, hrl. hjá Logos lögmannsþjónustu, var af Héraðsdómi Reykjavíkur skipaður aðstoðarmaður Stoða á þeim tíma sem greiðslustöðvunin gildir, til 20. október.Jakob segist ekki tjá sig um stöðuna, að öðru leyti en því að lögum samkvæmt þurfi minnst þremur sólarhringum fyrir þann tíma að vera búið að boða lánardrottna til fundar, eða í síðasta lagi föstudaginn 17. október. Á þeim fundi verði eignir og skuldir félagsins kynntar, og hvaða áætlanir eru uppi, ef einhverjar eru, um hvernig nýskipan verður komið á fjármálin. Stoðir þurfi að koma fyrir dóm 20. október, að óska þá eftir lengri greiðslustöðvun eða gera annað sem ákveðið verður á þeim tíma. Greiðslustöðvun sé úrræði sem gefur mönnum kost á að endurskipuleggja fjármál sín, án þess að verða fyrir truflunum frá kröfuhöfum.