Eignatengsl Eimskips og Icelandic við Samson
Eignarhaldsfélagið Samson, sem nú hefur óskað eftir greiðslustöðvun í kjölfar þess að ríkisvaldið hefur með nýsamþykktum neyðarlögum tekið yfir stjórnun Landsbankans, komst einmitt fyrst í sviðsljósið þegar félagið gerði samning við Framkvæmdanefnd um einkavæðingu upp úr miðjum október árið 2002 um kaup á 45,8% hlut í bankanum. Söluverð var rúmlega 12,3 milljarðar og skyldi að fullu greitt í Bandaríkjadölum.
Fram kom þá þegar að Samson væri eignarhaldsfélag þeirra Björgólfs Guðmundssonar, sonar hans Björgólfs Thors Björgólfssonar og viðskiptafélaga þeirra feðga, Magnúsar Þorsteinssonar. Magnús seldi hins vegar hluti sína í Samson eignarhaldsfélagi, félagi því sem nú hefur óskað eftir greiðslustöðvum, svo og Samson Global og Topaz Equities í ágúst 2005 en Samson Global átti um 22,5% hlut í Burðarási, seinna Eimskip, og Topaz Equities sem átti 7,1% hlut í Straumi fjárfestingarbanka. Björgólfsfeðgar voru kaupendurnir að þessum hlutum Magnúsar.
Í tilkynningu Samson eignarhaldsfélags í loks mars á þessu ári um ársreikninga félagsins fyrir árið 2007 kemur fram að eignarhluti félagsins í Landsbanka Íslands hf. var 4.559 m.kr. að nafnvirði í árslok eða 40,73% af heildarhlutafé bankans. Markaðsverð eignarhlutans var tæpl. 162 milljarðar m.kr. og gengi hlutabréfa bankans hafði hækkað um 34% á árinu.
Dótturfélag Samsons eignarhaldsfélags er félagið Ópera fjárfestingar ehf. sem er eigandi 25% eignarhlutar í Fjárfestingarfélaginu Gretti hf. en það félag á stór hluti í Eimskip eða 33,15% hlut samkvæmt upplýsingum Kauphallar frá 28. ágúst sl. og Icelandic Group eða 28,33% hlut miðað við hluthafalista frá 2. apríl. sl.
Þá átti Samson eignarhaldsfélag á síðasta ári Samson Properties, fasteignafélag en í árlok var stofnað um það nýtt félag, Novator Properties sem keypti allar eignir félagsins og yfirtók skuldir þess. Er félagið í eigu Björgólfsfeðga og tengist ekki greiðslustöðvunarbeiðni Samsons eignarhaldsfélags.
Helsta eign Samson Properties, nú Novator Properties, var í lok síðasta árs 50% hlutur í SG Nord Holding sem er sagt að eigi þá helmingshlut í WTC sem sé að þróa 129 þúsund fermetra háhýsi í Kaupmannahöfn, og 31% hlut í Sjælsö Gruppen, einu stærsta fasteignafélagi Danmerkur. Í ár eignaðist félagið 22,5% hlut í Property Group, sem er í eigu Straums, Guðmundar Þórðarsonar, Birgis Bieltvedt og þriggja Dana.
